संजय राऊत यांच्याकडे किती संपत्ती आहे, पतीपेक्षा किती श्रीमंत आहेत वर्षा राऊत?

मुंबई : मनी लाँड्रिंग प्रकरणाच्या चौकशीसाठी शिवसेनेचे खासदार संजय राऊत यांना ईडीने ताब्यात घेतले आहे. तत्पूर्वी, रविवारी सकाळी 7 वाजल्यापासून ईडीच्या पथकाने राऊत यांच्या घरावर छापा टाकला. यादरम्यान राऊत यांच्या घरातून 11 लाख 50 हजार रुपयांची रोकड जप्त करण्यात आल्याचे सांगण्यात येत आहे. या प्रकरणी ईडीने 27 जुलै रोजी राऊत यांना समन्स बजावले होते, मात्र ते संसदेच्या अधिवेशनाचा हवाला देत अनुपस्थित राहिले होते. पात्रा चाळ जमीन घोटाळ्याशी संबंधित मनी लाँड्रिंग प्रकरणात केवळ संजय राऊतच नाही तर त्यांची पत्नी वर्षा राऊतही आरोपी आहेत.

या रिपोर्टमध्ये जाणून घ्या संजय राऊत आणि त्यांच्या पत्नीने अधिकृतरीत्या किती संपत्ती जाहीर केली आहे? त्यांच्या मालमत्तेत काय आहे? वर्षा राउत किती श्रीमंत आहे?

राऊत आणि त्यांच्या पत्नीकडे किती मालमत्ता आहे?
matters.info नुसार, संजय राऊत यांनी 2016 मध्ये राज्यसभा निवडणूक लढवताना निवडणूक आयोगासमोर प्रतिज्ञापत्र सादर केले होते. त्यानुसार राऊत आणि त्यांच्या पत्नीकडे एकूण 14 कोटी 22 लाख 60 हजार 42 रुपयांची मालमत्ता असून त्यांच्यावर 4 कोटी 70 लाख रुपयांचे दायित्व आहे.

राऊत आणि त्यांच्या पत्नीकडे 2.30 कोटी रुपयांची जंगम मालमत्ता आहे. यामध्ये संजय राऊत यांच्याकडे 1.75 कोटींची संपत्ती आहे, तर त्यांच्या पत्नीकडे 51 लाखांपेक्षा जास्त संपत्ती आहे. यामध्ये सोन्या-चांदीच्या दागिन्यांचा समावेश आहे. प्रतिज्ञापत्रानुसार, राऊतकडे 1.40 लाख रुपयांची कार आणि परवानाधारक रिव्हॉल्व्हर आहे.

वर्षा राऊत पतीपेक्षा श्रीमंत
स्थावर मालमत्तेच्या बाबतीत वर्षा राऊत या पती संजय राऊत यांच्या खूप पुढे आहेत. दोघांकडे 11.92 कोटी रुपयांची स्थावर मालमत्ता असून त्यापैकी वर्षा यांच्याकडे 7 कोटी आणि संजयकडे 4.81 कोटींची स्थावर मालमत्ता आहे. यामध्ये शेतजमीन, बिगरशेती जमीन, व्यावसायिक इमारत आणि निवासी इमारतींचा समावेश आहे. दोघांचे दादर आणि भांडुपमध्ये फ्लॅट आहेत.

वर्षा राऊत यांच्याकडे 3.76 कोटी रुपयांच्या 3 व्यावसायिक इमारती आहेत. याशिवाय त्यांच्याकडे 8 बिगरशेती जमिनी आहेत ज्यांची किंमत 50 लाखांपेक्षा जास्त आहे. वर्षा या व्यवसायाने शिक्षिका असून एका फर्ममध्ये भागीदारही आहेत.