नवी दिल्ली – देशातील लहान मुले आणि तरुणांमधील धूम्रपानाच्या वाढत्या सवयीवर नियंत्रण मिळवण्यासाठी सर्वोच्च न्यायालयात याचिका दाखल करण्यात आली होती. ही याचिका शुक्रवारी फेटाळण्यात आली. शुभम अवस्थी आणि ऋषी मिश्रा या वकिलांनी दाखल केलेल्या याचिकेत सैल सिगारेटच्या विक्रीवर बंदी घालण्यात यावी आणि सिगारेट ओढण्याचे वय 18 वरून 21 वर्षे करावे, अशी मागणी करण्यात आली होती.
कोर्ट म्हणाले- चांगली केस आणा, चांगला युक्तिवाद करा
तुम्हाला प्रसिद्धी हवी असेल, तर चांगली केस आणा, चांगला युक्तिवाद करा, असे न्यायालयाने शुक्रवारी याचिकाकर्त्यांना सुनावले. केवळ प्रसिद्धीसाठी अशी याचिका दाखल करू नका. विशेष म्हणजे मे महिन्याच्या शेवटच्या आठवड्यात ही याचिका दाखल करण्यात आली होती. ज्यामध्ये धूम्रपानासाठी निश्चित केलेली जागा वगळण्याचीही मागणी करण्यात आली होती.
याचिकेत करण्यात आल्या या मागण्या
- शाळा-कॉलेजच्या आजूबाजूला उघड्यावर सिगारेट विक्रीवर बंदी घालावी.
- रुग्णालये आणि धार्मिक स्थळांजवळ सिगारेटची विक्री बंद करावी.
- केंद्राला धुम्रपान नियंत्रित करण्यासाठी योजना तयार करण्यास सांगितले पाहिजे.
- धुम्रपान क्षेत्रामध्ये धूर फिल्ट्रेशनसाठी मार्गदर्शक तत्त्वे तयार करण्याच्या सूचना द्याव्यात.