नवी दिल्ली – भारत सरकारने मंगळवारी मोठी कारवाई करत 78 यूट्यूब न्यूज चॅनेल आणि त्यांचे सोशल मीडिया अकाउंट ब्लॉक केले आहेत. याबाबत माहिती देताना माहिती आणि प्रसारण मंत्री अनुराग सिंह ठाकूर म्हणाले की, हे यूट्यूब न्यूज चॅनल आणि त्यांचे सोशल मीडिया अकाउंट बंद करण्याचा आदेश जारी करण्यात आला आहे.
IT कायदा 2000 च्या कलम 69-A चे उल्लंघन केल्याबद्दल ही कारवाई करण्यात आली आहे. सिंग यांच्या म्हणण्यानुसार, सरकारने गेल्या दोन वर्षांत 560 YouTube URL ब्लॉक केले आहेत. ब्लॉक केलेल्या YouTube न्यूज चॅनेलवरील दर्शकांची संख्या 68 दशलक्षांपेक्षा जास्त होती.
मंगळवारी लोकसभेत एका लेखी प्रश्नाला उत्तर देताना माहिती आणि प्रसारण मंत्र्यांनी ही माहिती दिली. खरं तर, तामिळनाडूच्या विरुधुनगरमधील काँग्रेस खासदार मणिकम टागोर बी यांनी सरकारने बंद केलेल्या YouTube न्यूज चॅनेलच्या संख्येचा तपशील मागितला होता.
माहिती आणि प्रसारण मंत्रालयाने यापूर्वीही अशीच कारवाई केली आहे. या वर्षाच्या सुरुवातीला देखील 16 यूट्यूब वृत्तवाहिन्या बंद करण्यात आल्या होत्या. यापैकी 10 भारतीय चॅनेल आणि 6 यूट्यूब न्यूज चॅनेल पाकिस्तानमधून कार्यरत आहेत आणि भारताच्या राष्ट्रीय सुरक्षा आणि सार्वजनिक व्यवस्थेमध्ये भारताची प्रतिमा खराब केल्याच्या आरोपामुळे ब्लॉक करण्यात आले होते. आयटी कायदा 2021 अंतर्गत ही कारवाई करण्यात आली आहे.
5 एप्रिल रोजीही करण्यात आली होती कारवाई
माहिती आणि प्रसारण मंत्रालयाने 5 एप्रिल रोजी आपत्कालीन शक्ती वापरून आयटी कायदा 2021 अंतर्गत कारवाई केली होती. या कारवाईत 22 यूट्यूब न्यूज चॅनेल, तीन ट्विटर अकाऊंट आणि एक फेसबुक अकाऊंटसह एक न्यूज वेबसाइटही बंद करण्यात आली. या चॅनेल्सची व्ह्यूअरशिप 250 कोटींहून अधिक होती. या वाहिन्यांद्वारे भारतीय लष्कर आणि भारताचे परराष्ट्र संबंध अशा विषयांवर चुकीची आणि दिशाभूल करणारी माहिती पसरवली जात होती.