मुंबई : उद्धव ठाकरे हे सत्तेतून पायउत्तार झाल्यानंतर आता मुख्यमंत्री एकनाथ शिंदे यांनी शिवसेनेला घेरण्याच्या दिशेने आणखी एक पाऊल टाकले आहे. सोमवारी उद्धव यांना आणखी एक मोठा धक्का देत त्यांनी आपली समिती बरखास्त करून नवी राष्ट्रीय कार्यकारिणी स्थापन केली आहे. नव्या कार्यकारिणीत एकनाथ शिंदे हे शिवसेनेचे प्रमुख नेते झाले आहेत.
सोमवारी राष्ट्रपतीपदाच्या निवडणुकीसाठी मतदान झाल्यानंतर शिवसेनेच्या शिंदे गटाच्या आमदारांची दक्षिण मुंबईतील एका पंचतारांकित हॉटेलमध्ये बैठक झाली, त्यात एकनाथ शिंदे यांची पक्षाचे प्रमुख नेते म्हणून निवड करण्यात आली. त्याचवेळी शिवसेनेच्या उद्धव गटातून हकालपट्टी करण्यात आलेले रामदास कदम आणि आनंदराव अडसूळ यांची नव्या कार्यकारिणीत पक्षनेतेपदी नियुक्ती करण्यात आली. दीपक केसरकर यांना प्रवक्ते करण्यात आले आहे. शिंदे गटाने सध्या शिवसेना अध्यक्षपदासाठी उद्धव ठाकरे यांनाच कायम ठेवले आहे. दुसरीकडे उद्धव ठाकरे यांनीही पक्ष वाचवण्यासाठी पदाधिकाऱ्यांच्या मोठ्या प्रमाणात नियुक्त्या सुरू केल्या आहेत.
14 खासदारांनी सभेला लावली ऑनलाइन उपस्थिती
शिंदे गटाच्या आमदारांच्या बैठकीत शिवसेनेचे 14 खासदारही ऑनलाइन सहभागी झाले होते. शिवसेनेचे एकूण 18 खासदार असून त्यापैकी 14 खासदार शिंदे गटात सामील होण्याची चर्चा सुरू आहे. दक्षिण-मध्य मुंबईचे खासदार राहुल शेवाळे यांना लोकसभेत शिवसेनेचे (शिंदे गट) नेते केले जाऊ शकते, असे सूत्रांचे म्हणणे आहे. त्याचबरोबर भावना गवळी यांची मुख्य सचेतक म्हणून नियुक्ती होऊ शकते. उद्धव ठाकरे यांनी नुकतीच भावना गवळी यांना या पदावरून हटवले होते.
शिवसेना संपवण्याचा डाव : सावंत
उद्धव ठाकरे गटाचे दक्षिण मुंबईचे खासदार अरविंद सावत म्हणाले की, आमदारांच्या अपात्रतेवर सर्वोच्च न्यायालयात सुनावणी होणे बाकी आहे. दुसरीकडे, शिंदे गट राज्यघटनेच्या नियमांविरुद्ध नेत्यांच्या नियुक्त्या करत आहे. शिवसेनेला संपवण्याचा हा डाव असून त्यामागे भाजपचा हात आहे.
एकनाथ शिंदे आज दिल्लीत
मुख्यमंत्री एकनाथ शिंदे मंगळवारी दिल्लीत येणार आहेत. शिवसेनेच्या खासदारांशी दिल्लीत बैठक घेऊन पुढील रणनीती तयार करू, असे सांगण्यात येत आहे. त्याचवेळी बुधवारी राज्य मंत्रिमंडळाचा विस्तार होणार असल्याची चर्चा आहे. एकनाथ शिंदे मंत्रिमंडळ विस्ताराबाबत भाजपच्या प्रमुख नेत्यांचाही सल्ला घेऊ शकतात, असे समजते.