लंडन – भारताने तिसऱ्या एकदिवसीय सामन्यात इंग्लंडचा पाच गडी राखून पराभव केला. या विजयासह टीम इंडियाने एकदिवसीय मालिकाही 2-1 ने जिंकली. ऋषभ पंतची शानदार फलंदाजी आणि हार्दिक पंड्याची अष्टपैलू कामगिरी यामुळे भारताने सामना जिंकला. हार्दिकने या सामन्यात 55 चेंडूत 71 धावा केल्या. याशिवाय त्याने चार विकेट्सही घेतल्या.
या सामन्यात हार्दिकने अनेक विक्रमही आपल्या नावावर केले. एकदिवसीय सामन्यात 50 हून अधिक धावा करणारा आणि चार किंवा त्याहून अधिक बळी घेणारा तो भारताचा पाचवा खेळाडू ठरला. हार्दिकच्या आधी श्रीकांत, सचिन तेंडुलकर, सौरव गांगुली आणि युवराज सिंग यांनी ही कामगीरी केली आहे. तथापि, हार्दिक वगळता इतर सर्वांनी ही कामगिरी आशियाई खेळपट्ट्यांवर केली आहे. आशियाबाहेर हा विक्रम करणारा हार्दिक हा पहिला भारतीय खेळाडू आहे. गांगुली आणि युवराजने ही कामगिरी प्रत्येकी दोनदा केली आहे.
त्याच वेळी, हार्दिक पंड्या हा इंग्लंडमध्ये वनडेमध्ये 50 पेक्षा जास्त धावा करणारा आणि चार किंवा त्याहून अधिक विकेट घेणारा चौथा खेळाडू आहे. त्याच्या आधी झिम्बाब्वेचा डंकन फ्लेचर (1983) आणि नील जॉन्सन (1999) आणि बांगलादेशचा शाकिब अल हसन (2019) यांनी अशी कामगिरी केली आहे. इंग्लंडविरुद्ध अशी कामगिरी करणारा हार्दिक पांड्या हा दुसरा खेळाडू आहे. त्याच्या आधी, श्रीलंकेच्या अरविंद डी सिल्वाने सिडनी क्रिकेट मैदानावर इंग्लंडविरुद्ध 50 किंवा त्याहून अधिक धावा केल्या होत्या आणि चार किंवा त्याहून अधिक बळी घेतले होते.
हार्दिकने केवळ एकदिवसीयच नाही, तर कसोटी आणि टी-20 आंतरराष्ट्रीय सामन्यांच्या एका डावातही ही कामगिरी केली आहे. त्याने 2018 मध्ये नॉटिंगहॅम कसोटीत इंग्लंडविरुद्ध एका डावात नाबाद 52 धावा केल्या आणि 28 धावांत पाच बळी घेतले. याशिवाय, त्याच वर्षी इंग्लंड दौऱ्यावर त्याने साउथॅम्प्टन येथील टी-20 मध्ये इंग्लंडविरुद्ध 51 धावा केल्या आणि 33 धावांत चार बळी घेतले. हार्दिकने इंग्लंडविरुद्ध तिन्ही फॉरमॅटमध्ये हा विक्रम केला आहे. तिन्ही फॉरमॅटमध्ये ही कामगिरी करणारा हार्दिक हा पाकिस्तानच्या मोहम्मद हाफीजनंतरचा दुसरा क्रिकेटर आहे.
सामन्याबद्दल बोलायचे झाले तर, प्रथम फलंदाजी करताना इंग्लंडचा संघ 45.5 षटकात 259 धावांवर आटोपला. प्रत्युत्तरात भारताने एका क्षणी 72 धावांत चार विकेट गमावल्या होत्या. यानंतर हार्दिक पांड्या आणि ऋषभ पंत यांनी पाचव्या विकेटसाठी 133 धावांची भागीदारी रचली. हार्दिक पांड्याने 55 चेंडूत 71 धावा केल्या. त्याचवेळी ऋषभ पंत 113 चेंडूत 125 धावा करून नाबाद राहिला. भारताने 43व्या षटकात 260 धावांचे लक्ष्य गाठले.