नवी दिल्ली – भारत आणि वेस्ट इंडिज यांच्यातील पाच सामन्यांच्या टी-20 मालिकेसाठी 11 जुलै रोजी टीम इंडियाची घोषणा होऊ शकते. इंग्लंडविरुद्धची टी-20 मालिका संपल्यानंतर वेस्ट इंडिजविरुद्धच्या मालिकेसाठी संघाची निवड केली जाणार असून या मालिकेत सर्व वरिष्ठ खेळाडू खेळणार आहेत. मात्र, विराट कोहलीने स्वत: संपूर्ण वेस्ट इंडिज दौऱ्यात विश्रांती मागितली असून तो या मालिकेत भारतीय संघाचा भाग असणार नाही.
एकदिवसीय मालिकेत विराटसह अनेक वरिष्ठ खेळाडूंना विश्रांती देण्यात आली होती, मात्र टी-20 मालिकेसाठी विराट वगळता सर्व वरिष्ठ खेळाडू उपलब्ध असतील. या मालिकेत ऑफस्पिनर रविचंद्रन अश्विनही टी-20 संघात पुनरागमन करण्याच्या तयारीत आहे. भारत आणि वेस्ट इंडिज यांच्यातील पाच सामन्यांची T20 मालिका 29 जुलैपासून सुरू होईल आणि 7 ऑगस्ट रोजी संपेल.
बीसीसीआयच्या अधिकाऱ्याने दिलेल्या माहितीनुसार, अश्विन हा टी-20 विश्वचषक स्पर्धेसाठी भारताच्या योजनेचा एक भाग आहे. तो वेस्ट इंडिजविरुद्धच्या टी-20 मालिकेत खेळणार आहे. त्याचवेळी वॉशिंग्टन सुंदर अजूनही खेळण्यासाठी तंदुरुस्त नाही. जेव्हा तो तंदुरुस्त असेल तेव्हा तो रॉयल लंडन कप आणि काउंटी चॅम्पियनशिपमध्ये लँकेशायरकडून खेळेल.
वेस्ट इंडिज मालिकेतील विश्रांतीनंतर विराट आशिया चषक स्पर्धेत भारतीय संघात सामील होऊ शकतो, परंतु इंग्लंडविरुद्धच्या दोन टी-20 सामन्यांमधील कामगिरीच्या आधारावर त्याचे संघातील स्थान निश्चित केले जाईल. दरम्यान, भारतीय संघ झिम्बाब्वेविरुद्ध टी-20 मालिका खेळू शकतो आणि आयर्लंडप्रमाणे ब संघ येथेही दौरा करणार आहे.
केएल राहुल आशिया चषकापूर्वी तंदुरुस्त होऊ शकतो आणि झिम्बाब्वेमधील टी20 मालिकेचा भाग असू शकतो. या मालिकेनंतर आशिया चषक स्पर्धा होणार आहे. अशा स्थितीत वरिष्ठ खेळाडूंना विश्रांती दिली जाण्याची खात्री आहे. हॅमस्ट्रिंगच्या दुखापतीतून सावरणारा दीपक चहरही आशिया चषकापूर्वी तंदुरुस्त होऊन टीम इंडियात पुनरागमन करू शकतो. 27 ऑगस्टपासून आशिया कपला सुरुवात होणार आहे.