बर्मिंगहॅम – इंग्लंडविरुद्धच्या कसोटी मालिकेतील शेवटच्या सामन्यात ऋषभ पंतने अप्रतिम फलंदाजी केली. त्याने 111 चेंडूत 146 धावा केल्या. या आक्रमक खेळीदरम्यान त्याने अनेक खास विक्रम आपल्या नावावर केले. या सामन्यात 24 वर्षीय पंतने सचिन तेंडुलकर आणि सुरेश रैनालाही मागे टाकले. पंतने इंग्लंडविरुद्धच्या सामन्याच्या पहिल्या दिवशी 19 चौकार आणि चार षटकार मारले. यासह त्याने आंतरराष्ट्रीय क्रिकेटमध्ये 100 षटकार पूर्ण केले आहेत.
आंतरराष्ट्रीय क्रिकेटमध्ये 100 षटकार ठोकणारा ऋषभ पंत हा सर्वात तरुण भारतीय फलंदाज आहे. त्याच्या आधी हा विक्रम सचिन तेंडुलकरच्या नावावर होता. त्याचवेळी या प्रकरणात सुरेश रैना दुसऱ्या क्रमांकावर होता.
आंतरराष्ट्रीय क्रिकेटमध्ये 100 षटकार मारणारा सर्वात तरुण भारतीय
- ऋषभ पंत – 24 वर्षे, 271 दिवस
- सचिन तेंडुलकर – 25 वर्षे
- सुरेश रैना – 25 वर्षे, 77 दिवस
पंतने कसोटी क्रिकेटमध्ये पूर्ण केल्या दोन हजार धावा
या सामन्यात ऋषभ पंतने कसोटी क्रिकेटमधील दोन हजार धावाही पूर्ण केल्या. त्याने 31 सामन्यांच्या 52 डावात 2066 धावा केल्या आहेत. त्याची कसोटी क्रिकेटमध्ये सरासरी 43.04 आहे. त्याच वेळी, स्ट्राइक रेट देखील 72.84 आहे. पंतने आतापर्यंत क्रिकेटच्या सर्वात मोठ्या फॉरमॅटमध्ये पाच शतके झळकावली आहेत. त्याच्या बॅटमधून नऊ अर्धशतकेही झळकली आहेत आणि नाबाद 159 ही त्याची सर्वोच्च धावसंख्या आहे.
टीम इंडियाने मारली जोरदार मुसंडी
या कसोटीत ऋषभ पंतने पुन्हा एकदा ट्रबलशूटरची भूमिका बजावली. ऋषभ पंत क्रिजवर फलंदाजीला आला, तेव्हा टीम इंडियाने 64 धावांवर तीन विकेट गमावल्या होत्या. विराट कोहली दुसऱ्या टोकाला खेळत होता, पण कोहलीही 11 धावा करून लवकरच बाद झाला. यानंतर श्रेयस अय्यरही फार काही करू शकला नाही आणि 15 धावा करून निघून गेला. 98 धावांवर भारताचा निम्मा संघ पॅव्हेलियनमध्ये परतला होता आणि अडचणीत दिसत होता. यानंतर पंतने जडेजाच्या जोडीने जोरदार पलटवार केला.
दोघांमध्ये 222 धावांची भागीदारी झाली. यादरम्यान पंतने कसोटी कारकिर्दीतील पाचवे शतक पूर्ण केले. हे त्याचे इंग्लंडविरुद्धचे तिसरे आणि भारताबाहेरचे चौथे शतक होते. पंत बाद झाला, तेव्हा भारताची धावसंख्या 320 धावा होती. पंतने या सामन्यात 131.53 च्या स्ट्राईक रेटने धावा केल्या. त्याच्या झंझावाती खेळीमुळे भारतीय संघ पहिल्या दिवशी 73 षटकांत 338 धावा करू शकला.