अलीकडेच बॉलिवूड अभिनेता सलमान खानला जीवे मारण्याच्या धमक्या आल्या होत्या. वडील सलीम खान यांना 5 जून रोजी सकाळी मिळालेल्या पत्राद्वारे अभिनेत्याला ही धमकी देण्यात आली होती. या बातमीने सिनेजगतात खळबळ उडाली होती आणि पोलीसही कडक तपासात गुंतले होते. त्याचवेळी, सलमान खाननंतर आता बॉलिवूड इंडस्ट्रीतील अभिनेत्री स्वरा भास्करला जीवे मारण्याची धमकी आली आहे. अभिनेत्रीला तिच्या घरी स्पीड पोस्टद्वारे एक पत्र मिळाले आहे, ज्यामध्ये स्वराला जीवे मारण्याची धमकी दिली आहे.
हिंदीत लिहिलेल्या या पत्रात थेट स्वरा भास्करची हत्या करण्याचा उल्लेख चर्चा आहे. वीर सावरकरांचा अपमान करणे थांबव आणि फक्त तिच्या चित्रपटांवर लक्ष केंद्रित कर, असा इशारा या अभिनेत्रीला देण्यात आला आहे. या पत्रात पाठवणाऱ्याचे नाव लिहिलेले नाही. मात्र हे पत्र पाठवणाऱ्याने स्वत:ला देशातील तरुण असल्याचे सांगितले आहे. पत्रात लिहिले आहे की, तुमच्या भाषेवर संयम ठेवा…वीर सावरकरांचा अपमान खपवून घेणार नाही. या देशातील तरुण. तुमचा चित्रपट आरामात बनवा नाहीतर अंत्यविधी करण्याची वेळ येईल. त्याचवेळी स्वराने वर्सोवा पोलीस ठाण्यात तक्रार दाखल केली आहे.
स्वरा भास्कर नेहमीच देशातील राजकीय मुद्द्यांवर खुलेपणाने बोलताना दिसली आहे. तिच्या वक्तव्यावरून अनेकदा गदारोळ झाला आहे, पण तरीही ती न घाबरता प्रत्येक मुद्द्यावर आपले मत मांडताना दिसते. स्वराने वीर सावरकरांसाठी अनेक ट्विटही केले आहेत. 2017 मध्ये, अभिनेत्रीने एक ट्विट केले होते ज्यात लिहिले होते, ‘सावरकरांनी ब्रिटिश सरकारची माफी मागितली. तुरुंगातून बाहेर पडण्याची भीक मागितली! ते ‘वीर’ नक्कीच नाही.