गिलगिट-बाल्टिस्तान चीनला देण्याच्या तयारीत पाकिस्तान, कर्ज फेडण्यासाठी उचलू शकतो पावले


गिलगिट-बाल्टिस्तान – पाकिस्तान आपले वाढते कर्ज फेडण्यासाठी पाकव्याप्त काश्मीर प्रदेश (पीओके) गिलगिट-बाल्टिस्तान (जीबी) चीनला भाडेपट्टीवर देऊ शकते. काराकोरम नॅशनल मूव्हमेंटच्या अध्यक्षा मुमताज यांनी भीती व्यक्त करताना सांगितले की, अलिप्त आणि दुर्लक्षित, गिलगिट बाल्टिस्तान हे जागतिक शक्तींशी स्पर्धा करण्यासाठी भविष्यातील युद्धभूमी बनू शकते. काश्मीरचा उत्तरेकडील भाग चीनच्या सीमेला लागून आहे आणि कर्ज फेडण्यासाठी पाकिस्तान कधीही तो चीनच्या हवाली करू शकतो, अशी भीती मुमताजने व्यक्त केली आहे. मात्र, मुमताज लोकांमध्ये खोट्या बातम्या पसरवत असल्याचे पाकिस्तानी मीडियामध्ये बोलले जात आहे.

चीनच्या दक्षिण आशियाई विस्तारासाठी वरदान आहे गिलगिट बाल्टिस्तान
मुमताज म्हणाल्या की, पाकिस्तान ज्या गिलगिट-बाल्टिस्तानवर बेकायदेशीरपणे कब्जा करत आहे, तो चीनच्या दक्षिण आशियाई विस्तारासाठी वरदान ठरेल. मुमताज म्हणाल्या की, जर पाकिस्तानने गिलगिट-बाल्टिस्तानचा ताबा चीनला दिला, तर त्यासाठी चीनकडून मोठा पैसा मिळू शकतो, ज्यामुळे सध्याच्या आर्थिक संकटाचा सामना करण्यास मदत होऊ शकते. पण हे पाऊल त्यांना महागात पडू शकते, कारण चीनचा प्रभाव कोणत्याही प्रकारे वाढू नये असे अमेरिकेला कधीही वाटणार नाही. IMF, जागतिक बँक आणि इतर जागतिक एजन्सींकडून निधी प्राप्त करण्यापासून नजीकच्या भविष्यासाठी अमेरिका पाकिस्तानला काळ्या यादीत टाकू शकते.

गिलगिट-बाल्टिस्तानची वाईट स्थिती: पाकिस्तानी मीडिया
गिलगिट-बाल्टिस्तानची लोकसंख्या कमी होत असल्याचे पाकिस्तानी मीडिया रिपोर्ट्समध्ये म्हटले आहे. सक्षम लोक आपल्या कुटुंबासह स्थलांतरित होत आहेत. चिंतेची बाब म्हणजे, एका अहवालात असे म्हटले आहे की पाकिस्तानमधील एकूण आत्महत्यांपैकी नऊ टक्के आत्महत्या जीबीमध्ये होतात. देशाच्या इतर भागांना वीज पुरवत असतानाही, गिलगिट-बाल्टिस्तानमध्ये फक्त दोन तास वीज आहे, कारण हा प्रदेश पाकिस्तानच्या राष्ट्रीय ग्रीडचा भाग नाही. याव्यतिरिक्त, ते अन्न टंचाई ग्रस्त आहे आणि जलविद्युत किंवा इतर संसाधनांवर नियंत्रण नाही.