कुलगाम/अनंतनाग – दक्षिण काश्मीरच्या कुलगाम आणि अनंतनागमध्ये गुरुवारी झालेल्या दोन वेगवेगळ्या चकमकीत महिला शिक्षिका रजनी बाला यांच्या मारेकऱ्यासह चार दहशतवादी ठार झाले. यासोबतच सरपंच आणि पंच दाम्पत्याच्या हत्येत सहभागी असलेल्या एका दहशतवाद्याचाही खात्मा करण्यात आला आहे. शिक्षिकेच्या मारेकऱ्याला तीन दिवसांच्या घेरावानंतर ठार मारण्यात यश आले आहे. ठार झालेले सर्व दहशतवादी हिजबुल मुजाहिद्दीनचे होते, त्यांच्याकडून शस्त्रे जप्त करण्यात आली आहेत. या वर्षात आतापर्यंत 109 दहशतवादी मारले गेले आहेत.
बुधवारी सकाळी पुन्हा सुरू झाली चकमक
मंगळवारी कुलगामच्या मिशीपोरामध्ये चकमक सुरू झाली. थोड्या वेळानंतर रात्रभर शांतता पसरली. बुधवारी सकाळी पुन्हा चकमक सुरू झाली. थोड्या वेळाने दुसऱ्या बाजूने होणारा गोळीबार थांबला. त्यानंतर सायंकाळी उशिरापर्यंत गोळीबार झाला नाही. यावेळी दहशतवादी लोकेशन बदलून लोकवस्तीच्या परिसरात घुसल्याचे सांगण्यात येत आहे.
शिक्षिका रजनी बाला यांच्या हत्येशी संबंधित दहशतवाद्यांचा खात्मा
मात्र, सुरक्षा दलांनी संपूर्ण परिसराची नाकेबंदी केली होती. तिसऱ्या दिवशी गुरुवारी दुपारी दहशतवाद्यांशी संपर्क प्रस्थापित झाला. यादरम्यान चकमकीत दोन दहशतवाद्यांना ठार करण्यात यश आले. पोलिसांनी सांगितले की, मारल्या गेलेल्या दहशतवाद्यांपैकी एक कुलगाममधील मोहनपोरा येथील झुबेर सोफी होता, जो 31 मे रोजी गोपालपोरा हायस्कूलमध्ये प्रवेश करून शिक्षिका रजनी बाला यांची हत्या करण्याच्या घटनेत सामील होता. दुसऱ्या दहशतवाद्याची ओळख अद्याप पटलेली नाही.
अनंतनागमध्ये घेरलेल्या दहशतवाद्यांनी केले नाही आत्मसमर्पण
त्याचवेळी, अनंतनाग जिल्ह्यातील हंगलगुंड भागात दहशतवाद्यांच्या उपस्थितीच्या माहितीवरून शोध मोहीम सुरू करण्यात आली. यादरम्यान नाकाबंदी होत असल्याचे पाहून दहशतवाद्यांनी सुरक्षा दलांवर गोळीबार सुरू केला. संयम बाळगत जवानांनी वारंवार दहशतवाद्यांना आत्मसमर्पण करण्यास सांगितले, मात्र त्यांनी गोळीबार सुरूच ठेवला.
सुरक्षा दलाच्या कारवाईत दोन दहशतवादी ठार झाले. पोलिसांनी दिलेल्या माहितीनुसार, जुनैद भट आणि बासित वाणी अशी दोघांची नावे आहेत. 9 ऑगस्ट 2021 रोजी अनंतनागमध्ये भाजपचे सरपंच गुलाम रसूल दार आणि त्यांच्या पंच पत्नीच्या हत्येत बासितचा सहभाग होता.