नवी दिल्ली : नॅशनल हेराल्ड प्रकरणी राहुल गांधींची ईडीची चौकशी आजही सुरूच आहे. राहुल गांधी सलग दुसऱ्या दिवशी अंमलबजावणी संचालनालयासमोर (ईडी) चौकशीसाठी हजर झाले. सकाळी 11 वाजता त्यांना ईडीच्या मुख्यालयात बोलावण्यात आले. सुमारे साडेचार तास चाललेल्या चौकशीनंतर त्यांना जेवणाच्या सुट्टीत ईडी कार्यालयातून बाहेर पडण्याची परवानगी देण्यात आली. मीडिया सूत्रांनी दिलेल्या माहितीनुसार, लंच ब्रेकनंतर राहुल गांधी पुन्हा ईडी अधिकाऱ्यांसमोर हजर होतील. यापूर्वी सोमवारीही त्यांची 10 तासांहून अधिक चौकशी करण्यात आली होती.
तर दुसरीकडे काँग्रेस नेत्यांनी राहुल गांधींच्या प्रश्नाला विरोध केला. दरम्यान, पोलिसांनी ईडीच्या समन्सला विरोध करणाऱ्या काँग्रेसचे प्रवक्ते रणदीप सिंग सुरजेवाला, उत्तराखंडचे माजी मुख्यमंत्री हरीश रावत यांच्यासह 100 हून अधिक नेत्यांना काँग्रेस कार्यालयाबाहेर ताब्यात घेतले आहे. हे सर्वजण राहुल गांधींसोबत ईडी कार्यालयाकडे कूच करण्याचा प्रयत्न करत होते.
सोमवारी काँग्रेस नेत्यांच्या हायव्होल्टेज ड्रामाच्या पार्श्वभूमीवर, प्रशासनाने कडेकोट सुरक्षा व्यवस्था केली आहे. पोलिसांनी काँग्रेस कार्यालय आणि ईडी मुख्यालयाभोवती कलम 144 लागू केले आहे आणि तेथे पोलीस आणि निमलष्करी कर्मचारी तैनात करण्यात आले आहेत. दुसरीकडे, काँग्रेसचे प्रवक्ते रणदीप सिंह सुरजेवाला म्हणाले की, पक्ष आजही समन्सविरोधात आंदोलन करत राहील. या चौकशी सत्ताधारी भाजपच्या सूडाच्या राजकारणाचा भाग असल्याचा आरोप काँग्रेसने केला आहे.
नॅशनल हेराल्ड वृत्तपत्राशी संबंधित कथित मनी लॉन्ड्रिंग प्रकरणात अंमलबजावणी संचालनालयाने राहुल गांधी आणि त्यांची आई सोनिया गांधी यांना चौकशीसाठी समन्स बजावले होते. सोनिया गांधी यांच्या प्रकृती अस्वास्थ्यामुळे त्यांना आता 23 जून रोजी बोलावण्यात आले आहे.