Independence Day : यावेळचा स्वातंत्र्यदिन असेल खास, प्रत्येक घरात फडकणार तिरंगा ध्वज, जाणून घ्या काय आहे केंद्र सरकारची तयारी

सर्व मंत्रालये आणि विभागांना सोपविण्यात आली जबाबदारी
आझादीच्या अमृत महोत्सवाच्या अंमलबजावणीत सहभागी असलेल्या उच्चस्तरीय राष्ट्रीय समितीने यंदाच्या स्वातंत्र्य दिनानिमित्त ‘हर घर राष्ट्रीय ध्वज’ हा कार्यक्रम राबवण्यास मान्यता दिली आहे. यापूर्वी काही राज्यांनी आपापल्या परीने हा कार्यक्रम आयोजित करण्याची योजना आखली होती. त्यानंतर देशभरात मोठ्या प्रमाणावर याचे आयोजन करण्याचा उपक्रम हाती घेण्यात आला. कार्यक्रमादरम्यान लोकांना राष्ट्रध्वज फडकावण्यासंबंधीचे नियम तसेच त्याच्या इतिहासाची माहिती करून दिली जाईल. सध्या समितीने या संपूर्ण मोहिमेची जबाबदारी सर्व मंत्रालये आणि विभागांवर सोपवली आहे. यामध्ये राष्ट्रध्वज तयार करणे, सर्वांना ध्वज फडकवण्यासाठी प्रवृत्त करणे आदी उपक्रमांचा समावेश आहे.

जनजागृतीसाठी निघतील प्रभातफेरी, ठिकठिकाणी होतील पथनाट्ये
सांस्कृतिक मंत्रालयाच्या मते हा कार्यक्रम स्वतःच खास असेल. यामध्ये 11 ते 17 ऑगस्ट दरम्यान कोणीही आपल्या घरी राष्ट्रध्वज फडकवू शकणार आहे. यादरम्यान लोकांना ध्वज फडकावण्याबाबतच्या नियमांची माहिती करून दिली जाईल, तसेच ध्वज सहज उपलब्ध करून दिला जाईल. लोकांना जागरूक करण्यासाठी शैक्षणिक संस्था आणि स्वयंसेवी संस्थांची सेवा घेतली जात आहे. सर्वसामान्यांमध्ये जनजागृती करण्यासाठी ठिकठिकाणी प्रभातफेरी, पथनाट्य आदींचे आयोजन करण्यास सांगितले आहे. UGC ने देशभरातील सर्व उच्च शैक्षणिक संस्थांच्या प्रमुखांना कार्यक्रमात आणि प्रसिद्धीमध्ये ठळकपणे सहभागी होण्याचे निर्देश दिले आहेत.

गावोगावी घेतला जात आहे अज्ञात स्वातंत्र्यसैनिकांचा शोध
स्वातंत्र्याच्या अमृत महोत्सवादरम्यान सांस्कृतिक मंत्रालयाकडून आणखी एक महत्त्वाची मोहीम राबविण्यात येत आहे. त्याअंतर्गत गावोगावी अज्ञात स्वातंत्र्यसैनिकांचा शोध घेतला जात आहे. असे सुमारे एक लाख लढवय्ये शोधण्याचे उद्दिष्ट ठेवण्यात आले आहे. सर्व जिल्ह्यांना अशा लोकांची माहिती गोळा करण्यास सांगितले आहे ज्यांनी स्वातंत्र्य चळवळीत भाग घेतला, परंतु इतिहासात त्यांचे कुठेही नाव नाही. विशेष म्हणजे या उपक्रमांतर्गत आतापर्यंत एक हजाराहून अधिक निनावी स्वातंत्र्यसैनिक सापडले आहेत.