अहमदाबाद – काही दिवसांपूर्वी गुजरात दहशतविरोधी पथकाने (एटीएस) सात पाकिस्तानी तस्करांना गुजरात किनाऱ्याजवळील एका बोटीवरुन ताब्यात घेतले. एटीएसच्या अधिकाऱ्यांनी सांगितले की आरोपींचा अंमली पदार्थांची तस्करी करण्याता विचार केला होता, परंतु आरोपींनी एटीएस टीमला पाहिल्यानंतर त्यांना भीती वाटली आणि त्यांनी ड्रग्सने भरलेल्या दोन पिशव्या समुद्रात फेकल्या.
31 मे रोजी करण्यात आली होती अटक
31 मे रोजी गुजरात एटीएस आणि इंडियन कोस्ट गार्ड (आयसीजी) यांनी गुरुवारी सात पाकिस्तानी नागरिकांना कच्छमधील किनाऱ्यावरील एका बोटीतून अटक केली. यानंतर, अल नुमान नावाच्या या बोटीला देवभूमी द्वारकाच्या ओका किनारपट्टीवर नेण्यात आले, जिथे आरोपींना बेकायदेशीरपणे भारतीय पाण्यात प्रवेश केल्याबद्दल परदेशी कायद्यांतर्गत अटक करण्यात आली. गुजरात एटीएस अधिकाऱ्यांच्या म्हणण्यानुसार, त्या काळात बोटीमध्ये कोणतेही मादक पदार्थ आढळले नाहीत.
सर्व आरोपी तस्करी करण्याचा प्रयत्न करीत होते: गुजरात एटीएस
गुजरात एटीएसच्या अधिकाऱ्यांनी शुक्रवारी असा दावा केला की आरोपी मादक पदार्थांची बोटीतून तस्करी करण्याचा आणि कच्छमधील जाखौ किनारपट्टीवरून भारतीय हद्दीत नेण्याचा प्रयत्न करीत होते.
अटक केलेल्या सात लोकांची ओळख पटली
अटक करण्यात आलेल्या सात लोकांची ओळख मोहम्मद अक्रम बलुच, झुबैर बलुच, इशाक बलोच, शहीद अली बलुच, अशरफ बलुच, शोएब बलुच आणि शाहजाद बलोच अशी करण्यात आली आहे. एटीएसच्या अधिकाऱ्यांच्या म्हणण्यानुसार, पाकिस्तानच्या बलूच प्रांतातील ग्वादर बंदरातून अल-नौमन नावाच्या बोटीने सात पाकिस्तानी रवाना झाले होते.