अहमदाबाद – गुजरात काँग्रेसचे माजी नेते हार्दिक पटेल यांनी भारतीय जनता पक्षात प्रवेश करण्याबाबत मोठे विधान केले आहे. एएनआय या वृत्तसंस्थेशी बोलताना हार्दिक पटेलने 2 जून रोजी भाजपमध्ये प्रवेश करणार असल्याचे सांगितले आहे. पटेल यांनी 18 मे रोजी काँग्रेस पक्षाचा राजीनामा दिला होता. राज्यातील विधानसभा निवडणुकीपूर्वी त्यांचे हे पाऊल काँग्रेससाठी मोठा धक्का मानला जात आहे. पटेल यांनी 2019 मध्ये काँग्रेसमध्ये प्रवेश केला होता. 11 जुलै 2020 रोजी त्यांची गुजरात प्रदेश काँग्रेस कमिटीचे कार्याध्यक्ष म्हणून नियुक्ती करण्यात आली. मात्र, 2022 पर्यंत त्यांचा भ्रमनिरास झाला आणि त्यांनी राजीनामा दिला.
काँग्रेसचा राजीनामा देताना हार्दिक पटेलने पक्षाच्या हायकमांडवर जोरदार टीका केली होती. त्यांनी सोनिया गांधींना पत्र लिहून राजीनामा सुपूर्द केला. या पत्रात त्यांनी पक्षाबाबत अनेक गोष्टी सांगितल्या होत्या.
राजीनामा पत्रात काँग्रेसवर साधण्यात आला जोरदार निशाणा
आपल्या राजीनाम्याच्या पत्रात हार्दिकने लिहिले होते की, काँग्रेस पक्ष केवळ निषेधाच्या राजकारणासाठी कमी झाला आहे, तर देशातील जनतेला विरोध नाही तर त्यांच्या भविष्याचा विचार करणारा आणि देशाला पुढे नेण्याची क्षमता असलेला पर्याय हवा आहे. त्यांनी राजीनामा पत्रात पुढे लिहिले आहे की, अयोध्येतील राम मंदिर असो, सीएए-एनआरसीचा मुद्दा असो, जम्मू-काश्मीरमधून कलम 370 हटवणे असो किंवा जीएसटी लागू करणे असो, देशाला दीर्घ काळापासून यावर तोडगा हवा होता. मात्र, काँग्रेसने यात केवळ अडथळा म्हणून काम केले. काँग्रेसची भूमिका केवळ केंद्राला विरोध करण्यापुरती मर्यादित होती.