रांची: रांची विमानतळावर एका दिव्यांग मुलाला विमानात बसू न दिल्याबद्दल विमान वाहतूक महासंचालक, डीजीसीएने इंडिगो विमान कंपनीला पाच लाखांचा दंड ठोठावला आहे. डीजीसीएने म्हटले आहे की इंडिगोच्या ग्राउंड स्टाफने ज्या प्रकारे दिव्यांग मुलाला वागणूक दिली, ती योग्य नव्हती आणि परिस्थिती बिघडली. DGCA ने विमान कंपनीला कारणे दाखवा नोटीसही बजावली असून या घटनेबद्दल नाराजी व्यक्त केली आहे.
डीजीसीएने दिले होते चौकशीचे आदेश
यापूर्वी 7 मे रोजी इंडिगो एअरलाइन्सच्या कर्मचाऱ्यांनी रांची विमानतळावर एका दिव्यांग मुलाला विमानात चढण्यापासून रोखले होते. इंडिगोने याचे कारण सांगितले की, मूल विमानात प्रवास करताना घाबरले होते. ही घटना उघडकीस आल्यानंतर विमान वाहतूक नियामक DGCA ने या प्रकरणाची चौकशी करण्याचे निर्देश दिले होते.
केंद्रानेही घेतली होती दखल
त्याचवेळी केंद्र सरकारनेही याची दखल घेतली होती. केंद्रीय नागरी उड्डाण आणि विमान वाहतूक मंत्री ज्योतिरादित्य सिंधिया यांनीही यावर ट्विट केले होते. संपूर्ण तपास त्यांच्या देखरेखी खाली होईल, असे त्यांनी सांगितले होते. सिंधिया यांच्या कठोर वृत्तीनंतर एअरलाइनने माफी मागितली होती.
डीजीसीएने तयार केली होती तीन सदस्यीय टीम
यानंतर डीजीसीएने या प्रकरणातील तथ्य तपासण्यासाठी तीन सदस्यीय टीम तयार केली होती. तीन सदस्यीय पथक रांची आणि हैदराबाद येथे जाऊन एका आठवड्यात पुरावे गोळा केले. समितीच्या अहवालाच्या आधारे ही कारवाई करण्यात आली.