टेक्सास: प्रसिद्ध इलेक्ट्रिक कार निर्माता टेस्लाचे सीईओ एलन मस्क यांनी भारतात टेस्लाचा उत्पादन प्रकल्प उभारणार नसल्याचे संकेत दिले आहेत. एलन मस्क यांनी शुक्रवारी ट्विट केले की जोपर्यंत कंपनीला दक्षिण आशियाई देशात प्रथमच आयात केलेल्या कारची विक्री आणि सेवा करण्याची परवानगी मिळत नाही, तोपर्यंत तेथे कार प्लांट उभारता येणार नाही. ट्विटरवरील एका व्यक्तीने मस्क तसेच टेस्लाच्या भारतात प्लांट उभारण्याच्या योजनांवर प्रश्नचिन्ह उपस्थित केले. यावर अब्जाधीश उद्योजक मस्क यांनी उत्तर दिले, टेस्ला अशा कोणत्याही ठिकाणी उत्पादन प्रकल्प उभारणार नाही, जिथे आम्हाला आधीच विक्री आणि कार सर्व्हिसिंगची परवानगी नाही.
एलन मस्क यांच्या या टिप्पण्यांवरून असे दिसून येते की भारत आणि टेल्सा यांच्यात देशात उत्पादन प्रकल्प उभारण्यावरून वाद सुरू आहे. एप्रिलच्या सुरुवातीला, भारतातील ऑटोमोबाईल उत्पादनासाठी अनुकूल वातावरण अधोरेखित करताना, केंद्रीय रस्ते वाहतूक आणि महामार्ग मंत्री नितीन गडकरी म्हणाले होते, की एलन मस्क यांचे भारतात ई-वाहनांचे उत्पादन स्वागतार्ह आहे, परंतु जर टेस्लाचे मालक चीनमध्ये कार बनवून भारतात विकत असतील तर हा कदाचित “चांगला प्रस्ताव” नसेल. दिल्लीतील एका खाजगी कार्यक्रमात बोलताना गडकरी यांनी भारतातील टेस्लाच्या चिंतेवर विचारलेल्या प्रश्नाला उत्तर देताना ही टिप्पणी केली होती.
गडकरी म्हणाले, हा एक अतिशय सोपा पर्याय आहे; जर एलन मस्क भारतात टेस्ला कार तयार करण्यास तयार असतील, तर काही हरकत नाही. आमच्याकडे सर्व पात्रता आहेत, विक्रेते उपलब्ध आहेत. आमच्याकडे सर्व प्रकारचे तंत्रज्ञान आहे आणि त्यामुळे, ते खर्च कमी करू शकतात.
टेस्लाला भारतात उत्पादन सुरू करण्याचे निमंत्रण देताना केंद्रीय मंत्री म्हणाले की, भारत ही एक मोठी बाजारपेठ आहे आणि निर्यात सक्षम करण्यासाठी बंदरांसारख्या पायाभूत सुविधा उपलब्ध आहेत. ते म्हणाले, भारतात आपले स्वागत आहे. आम्हाला कोणतीही अडचण नाही, पण समजा, त्यांना चीनमध्ये उत्पादन करायचे आहे आणि भारतात विक्री करायची आहे, तर भारतासाठी ती चांगली ऑफर असू शकत नाही. आम्ही त्यांना विनंती करतो की भारतात या आणि येथे उत्पादन करा.
गेल्या काही वर्षांत भारतातील ई-वाहन क्षेत्रात झालेल्या प्रचंड वाढीचा दाखला देत गडकरी पुढे म्हणाले की, मी एलन मस्क यांना सुचवितो की, भारतात त्यांना चांगली बाजारपेठ मिळेल आणि भारतीय बाजारपेठ खूप मोठी आहे. ते पुढे म्हणाले की चीनमध्ये उपलब्ध असलेले सर्व दर्जेदार विक्रेते आणि ऑटोमोबाईल स्पेअर पार्ट्सही भारताकडे आहेत. तसेच त्यांना ते भारतात बनवणे आणि भारतात विकणे सोपे असू शकते. त्यांना यातून चांगला नफा मिळेल, त्यात चांगले अर्थशास्त्र आहे. मी त्यांना भारतात येऊन येथे उत्पादन सुरू करण्याची विनंती करेन.