मथुरा – सर्वोच्च न्यायालयाच्या अधिवक्ता रंजना अग्निहोत्री यांच्या मथुरेतील श्रीकृष्ण जन्मभूमी आणि शाही इदगाह मशीद वादाच्या प्रकरणाची सुनावणी गुरुवारी वरिष्ठ दिवाणी न्यायाधीशांच्या न्यायालयात झाली. श्री कृष्ण जन्मस्थान सेवा संस्थान आणि ईदगाह कमिटी यांच्यातील करार रद्द करावा, अशी मागणी फिर्यादीने केली आहे. तसेच ईदगाहची जमीन श्री कृष्ण जन्मभूमी ट्रस्टकडे सुपूर्द करण्यात यावी. न्यायालयाने या प्रकरणाच्या पुढील सुनावणीसाठी 1 जुलैची तारीख निश्चित केली आहे.
नारायणी सेना उच्च न्यायालयात
नारायणी सेनेचे मनीष यादव यांनी उच्च न्यायालयात अर्ज केला आहे. त्यांच्या बाबतीत उपासना कायदा लागू होऊ नये, अशी विनंती आहे. मनीष यादव यांनी मथुरा जिल्हा न्यायालयात जन्मभूमीच्या जमिनीवर ईदगाह बांधण्यात आल्याचा दावा दाखल केला आहे. पुरावे गोळा करण्यासाठी न्यायालयीन आयोग नेमून तपास करण्याची मागणीही करण्यात आली आहे.
‘न्यासाच्या नावे जमीन’
श्रीकृष्ण जन्मभूमी संस्थानच्या वतीने वकील मुकेश खंडेलवाल यांनी गुरुवारी मथुरा कोर्टात अर्ज देऊन कागदपत्रे सुपूर्द केली. ते म्हणाले की, महापालिकेत श्री कृष्ण जन्मभूमी ट्रस्टच्या नावावर 13.37 एकर जमीन नोंदणीकृत असून, त्यात ईदगाहचे नाव नाही. त्याचबरोबर ट्रस्ट करही भरत असल्याने ही जमीन श्रीकृष्ण जन्मभूमी ट्रस्टची होती. ईदगाह हटवण्याचे आदेश द्यावेत, अशी मागणी न्यायालयाकडे केली.