नवी दिल्ली : जम्मू-काश्मीर लिबरेशन फ्रंटचा फुटीरतावादी नेता यासिन मलिक याला दिल्लीतील विशेष न्यायालयाने टेरर फंडिंग प्रकरणात दोषी ठरवून जन्मठेपेची शिक्षा सुनावली आहे. यासोबतच दहा लाख रुपयांचा दंडही ठोठावण्यात आला आहे. काश्मीर खोऱ्यात कोणताही अनुचित प्रकार घडू नये, यासाठी सुरक्षा यंत्रणांनी कडक नजर ठेवली आहे. विशेष न्यायाधीश प्रवीण सिंह यांनी 19 मे रोजी यासिनला बेकायदेशीर क्रियाकलाप प्रतिबंधक कायद्यांतर्गत (UAPA) सर्व आरोपांसाठी दोषी ठरवले होते. यासीन मलिकच्या खटल्याच्या सुनावणीमुळे पटियाला हाऊस कोर्टाबाहेर कडेकोट सुरक्षा व्यवस्था ठेवण्यात आली आहे.
यासीन मलिकच्या घराबाहेर तणाव
काश्मीर खोऱ्यातील यासीन मलिकच्या घराबाहेर मोठ्या संख्येने समर्थक जमले असून ते यासीनच्या समर्थनार्थ घोषणा देत आहेत. परिसरातील सुरक्षा व्यवस्था अत्यंत कडक आहे. ड्रोनद्वारे नजर ठेवली जात आहे. वातावरण तणावपूर्ण असून पोलीस आणि इतर सुरक्षा दल परिस्थितीवर लक्ष ठेवून आहेत.
यासीन म्हणाला- मी फाशी स्वीकारेन, मी कोणाकडे भीक मागणार नाही
खटला सुरू झाल्यावर एनआयएने दोषी मलिकला फाशीची शिक्षा देण्याची मागणी केली. ज्यावर यासीन म्हणाला की, मी निर्णय न्यायालयाच्या विवेकावर सोडतो, मी कोणाकडे भीक मागणार नाही. मी फाशी स्वीकारेन. माझा दहशतवादी कारवायांमध्ये सहभाग असल्याचे तपास यंत्रणांनी सिद्ध केल्यास मी राजकारणातून निवृत्ती घेईन. मी सात पंतप्रधानांसोबत काम केले आहे.
सर्व पक्षकारांचा शेवटचा युक्तिवाद ऐकून घेत न्यायालयाने दुपारी 3.30 वाजेपर्यंत या प्रकरणी निर्णय राखून ठेवला होता. तसेच राष्ट्रीय तपास संस्थेच्या (एनआयए) अधिकाऱ्यांना मलिकच्या आर्थिक स्थितीचे मूल्यांकन करण्याचे निर्देश दिले जेणेकरून दंडाची रक्कम निश्चित करता येईल.
यासीनने 10 मे रोजी न्यायालयाला सांगितले होते की, तो यापुढे दहशतवादी कायदा, दहशतवादी फंडिंग, दहशतवादी कृत्ये, देशद्रोह, फसवणुकीच्या खटल्यांना सामोरे जाणार नाही. फारुख अहमद दार उर्फ बिट्टा कराटे, शाबीर शाह, मसरत आलम, मोहम्मद युसूफ शाह, आफताब अहमद शाह, अल्ताफ अहमद शाह, नईम खान, मोहम्मद अकबर खांडे, राजा मेहराजुद्दीन कलवाल यांच्यासह 20 काश्मिरी फुटीरतावादी नेत्यांवर न्यायालयाने औपचारिकपणे आरोप निश्चित केले.
सलाहुद्दीन आणि हाफिज सईद फरार घोषित
लष्कर-ए-तैयबाचा पाकिस्तानस्थित संस्थापक हाफिज सईद आणि हिजबुल मुजाहिद्दीनचा प्रमुख सय्यद सलाहुद्दीन यांच्याविरुद्धही आरोपपत्र दाखल करण्यात आले होते, ज्यांना या प्रकरणात फरार घोषित करण्यात आले आहे.