नवी दिल्ली : रानिल विक्रमसिंघे श्रीलंकेचे नवे पंतप्रधान झाले आहेत. विशेष म्हणजे ते त्यांच्या पक्षाचे एकमेव खासदार आहेत. श्रीलंकेची सत्ता पाचव्यांदा सांभाळणारे विक्रमसिंघे युनायटेड नॅशनल पार्टीचे (UNP) सदस्य आहेत. UNP हा श्रीलंकेतील सर्वात जुना राजकीय पक्ष आहे. ऑगस्ट 2020 मध्ये झालेल्या निवडणुकीत या पक्षाला एकही जागा जिंकता आली नाही. कोलंबो मतदारसंघातून पक्षाचे नेते रानिल विक्रमसिंघे यांचाही पराभव झाला. नंतर, एकत्रित राष्ट्रीय मतांच्या आधारावर UNP ला एक जागा देण्यात आली. विक्रमसिंघे जून 2021 मध्ये या जागेवरून संसदेत पोहोचले. सध्या ते त्यांच्या पक्षाचे एकमेव खासदार आहेत.
श्रीलंकेत त्यांच्या पक्षाचा एकमेव खासदार असतानाही विक्रमसिंघे पंतप्रधान झाले, पण तुम्हाला माहिती आहे का भारतातही अशी प्रकरणे समोर आली आहेत. जेव्हा एकमेव सर्वात मोठा पक्ष सत्तेपर्यंत पोहोचला नव्हता. राज्यातही एकेकाळी अपक्ष आमदार राज्याचा मुख्यमंत्री झाला होता. चला जाणून घेऊया अशाच रंजक गोष्टी…
जेव्हा अपक्ष आमदार झाला होता मुख्यमंत्री
नोव्हेंबर 2000 मध्ये झारखंड राज्य अस्तित्वात आले. भाजप सत्तेवर आली. जेव्हा पाच वर्षांनी निवडणुका झाल्या, तेव्हा कोणत्याही पक्षाला बहुमत मिळाले नाही. आधी शिबू सोरेन मग अर्जुन मुंडा राज्याचे मुख्यमंत्री झाले. 2006 मध्ये तीन अपक्ष आमदारांनी मुंडा सरकारचा पाठिंबा काढून घेतला. भाजप सरकार अल्पमतात आले. पाठिंबा काढून घेणारे तीन आमदार यूपीएसोबत गेले. इतकेच नाही तर या तीन अपक्ष आमदारांपैकी मधु कोडा हे विधिमंडळ पक्षाचे नेते बनले. अपक्ष आमदार असलेले कोडा राज्याचे मुख्यमंत्री झाले. तथापि, केवळ 23 महिन्यांनंतर झारखंड मुक्ती मोर्चाने कोडा सरकारचा पाठिंबा काढून घेतला. कोडा यांना राजीनामा द्यावा लागला.
लोकसभेच्या केवळ 46 जागा जिंकणाऱ्या पक्षातून झाले दोन पंतप्रधान
1996 च्या लोकसभा निवडणुकीत कोणत्याही पक्षाला बहुमत मिळाले नाही. भारतीय जनता पक्ष 161 जागा जिंकून सर्वात मोठा पक्ष ठरला होता आणि अटलबिहारी वाजपेयी देशाचे पंतप्रधान झाले. वाजपेयी सभागृहात बहुमत मिळवू शकले नाहीत आणि त्यांना राजीनामा द्यावा लागला. त्यावेळी एचडी देवेगौडा नवे पंतप्रधान झाले. देवेगौडा जनता दलाचे होते. जनता दलाचे त्यावेळी केवळ 46 खासदार होते. सभागृहातील संख्याबळाच्या बाबतीत त्यांचा पक्ष तिसऱ्या क्रमांकावर होता. यानंतरही जनता दलाचे एक नव्हे तर दोन पंतप्रधान झाले. आधी देवेगौडा आणि नंतर इंदरकुमार गुजराल.
दरम्यान निवडणुकांमध्ये दोन सर्वात मोठ्या पक्षांव्यतिरिक्त अन्य पक्षाचा नेता मुख्यमंत्री झाल्यावर अशी प्रकरणे राज्यांमध्येही समोर आली आहेत. सध्याच्या काळाबद्दल बोलायचे झाले तर बिहारमध्ये सध्या एनडीएचे सरकार आहे. नितीशकुमार हे राज्याचे मुख्यमंत्री आहेत. राज्यातील जागांच्या बाबतीत नितीशकुमार यांचा पक्ष तिसऱ्या क्रमांकावर आहे. 77 आमदारांसह भाजप सर्वात मोठा पक्ष आहे. त्याचवेळी 76 आमदारांसह राजद हा दुसरा पक्ष आहे. नितीश यांचा पक्ष जेडीयूकडे केवळ 45 आमदार आहेत. महाराष्ट्रात सर्वात मोठा पक्ष असतानाही भाजप विरोधी बाकावर आहे. त्याचवेळी 288 आमदारांच्या घरात केवळ 56 आमदार असलेले शिवसेनेचे उद्धव ठाकरे हे राज्याचे मुख्यमंत्री आहेत.