चेन्नई – तामिळनाडूचे राज्यपाल आर.एन.रवी यांनी राज्यातील नीट परीक्षा रद्द करण्याबाबतचे विधेयक केंद्रीय गृहमंत्रालयाला पाठवले आहे. येथून हे विधेयक राष्ट्रपतींच्या विचारार्थ राष्ट्रपती भवनात पाठवले जाईल. मुख्यमंत्री एमके स्टॅलिन यांनी 04 मे 2022 रोजी तामिळनाडू विधानसभेत ही माहिती दिली. स्टॅलिन यांनी सभागृहात सांगितले की, 8 फेब्रुवारी रोजी तामिळनाडू विधानसभेने NEET विरोधी विधेयक दुसऱ्यांदा मंजूर केले.
मात्र, याआधीही तामिळनाडू विधानसभेत राज्याला NEET परीक्षेपासून मुक्त करण्यासाठी विधेयक मंजूर करण्यात आले होते. पण राज्यपालांनी ते परत पाठवले. फेब्रुवारी 2022 मध्ये राज्य विधानसभेत दुसऱ्यांदा NEET विरोधी विधेयक मंजूर करण्यात आले, तेव्हा राज्यपाल आर.एन. रवी यांना पाठवण्यात आले. त्यानंतर हे विधेयक राष्ट्रपतींच्या मंजुरीसाठी राज्यपालांनी केंद्रीय गृह मंत्रालयाकडे पाठवले आहे.