मुंबई : ठाणे येथील व्यापारी मनसुख हिरेन यांच्या निर्घृण हत्येचा मुख्य सूत्रधार माजी पोलीस अधिकारी प्रदीप शर्मा असल्याचा दावा राष्ट्रीय तपास यंत्रणेने (एनआयए) बुधवारी मुंबई उच्च न्यायालयासमोर केला. एनआयएच्या म्हणण्यानुसार, उद्योगपती मुकेश अंबारी यांच्या कुटुंबाला धमकावण्याच्या मोठ्या कटात मनसुख हिरेन हा एक कमकुवत दुवा असल्याचे मानले जात होते.
उच्च न्यायालयात दाखल केलेल्या प्रतिज्ञापत्रात एनआयएने म्हटले आहे की, या प्रकरणातील इतर आरोपींसह शर्मा यांनी पोलिस आयुक्त कार्यालयाच्या इमारतीच्या आवारात अनेक बैठका घेतल्या, जिथे कथित कट रचला गेला. एजन्सीने असा दावा केला आहे की बडतर्फ केलेले पोलीस अधिकारी सचिन वाझे यांनी शर्माला 45 लाख रुपये दिले होते, जे त्यांनी हिरेनची हत्या करणाऱ्या व्यक्तीला दिले होते.
शर्मा यांच्या जामीन अर्जाला विरोध करताना एनआयएने असेही म्हटले की शर्मा निर्दोष नाहीत आणि त्यांनी गुन्हेगारी कट, खून आणि दहशतवादी कृत्ये केल्याचा आरोप केला आहे. न्यायमूर्ती ए.एस.चांदूरकर आणि न्यायमूर्ती जी.ए.सानप यांच्या खंडपीठाने याचिकेवर पुढील सुनावणीसाठी पुढील तारीख निश्चित केली आहे.
25 फेब्रुवारी 2021 रोजी दक्षिण मुंबईतील मुकेश अंबानी यांच्या निवासस्थान अँटिलियाच्या बाहेर स्फोटकांनी भरलेला एसयूपी सापडली. ही एसयूव्ही मनसुख हिरेन यांची होती, जो गेल्या वर्षी 5 मार्च रोजी ठाण्याजवळ एका खाडीत (लहान नदी) मृतावस्थेत सापडला होता.
एनआयएने आपल्या प्रतिज्ञापत्रात म्हटले आहे की प्रदीप शर्मा हे या टोळीचे सक्रिय सदस्य होते, ज्यांनी अंबानी कुटुंब आणि इतरांवर दहशत माजविण्याचा कट रचला होता आणि मनसुख हिरेन हा कटातील कमकुवत दुवा होता, म्हणून शर्माने त्याची हत्या केली. मनसुख हिरेनला संपूर्ण कट आणि आरोपींबद्दल माहिती असल्याचा दावा एजन्सीने केला आहे.
तो सत्य उघड करणार नाही, या भीतीने त्याची हत्या करण्यात आली. कारण असे घडले असते तर शर्मा आणि वाझे यांच्यासाठी मोठी अडचण निर्माण झाली असती. माजी ‘एन्काउंटर स्पेशालिस्ट’ शर्मा यांना NIA ने 17 जून 2021 रोजी अटक केली होती आणि सध्या ते न्यायालयीन कोठडीत आहेत. एनआयएच्या म्हणण्यानुसार शर्मा आणि इतर आरोपींनी यूएपीए अंतर्गत गुन्हे केले आहेत.
एजन्सीने म्हटले आहे की जमा केलेल्या पुराव्यांवरून हे स्पष्ट झाले आहे की प्रदीप शर्मा या गुन्ह्यात सक्रियपणे सहभागी होते आणि त्यांनी कट रचणे, दहशतवादी कृत्य, दहशतवादी टोळीचे सदस्य, अपहरण, खून आणि पुरावे नष्ट करणे असे गुन्हे केले आहेत. एनआयएच्या म्हणण्यानुसार, अँटिलियाबाहेर घडलेल्या घटनेची जबाबदारी स्वीकारण्यास नकार दिल्यानंतर हिरेनची हत्या करण्यात आली.