कीव्ह – युक्रेनच्या लिसिचान्स्क शहरातील तेल शुद्धीकरण कारखान्यावर रशियन सैन्याने बॉम्बहल्ला केला आणि तेथे मोठी आग लागली. प्रदेशाच्या राज्यपालांनी ही माहिती देताना सांगितले की, तेल शुद्धीकरण केंद्राला लक्ष्य करण्याची ही पहिलीच वेळ नाही आणि रशियन सैन्य स्थानिक आपत्कालीन सेवा नष्ट करण्याचा प्रयत्न करत असल्याचा आरोप त्यांनी केला. ते म्हणाले की हल्ल्याच्या वेळी रिफायनरीमध्ये कोणतेही इंधन नव्हते
शनिवारी युक्रेनच्या अध्यक्षीय कार्यालयाने सांगितले की, रशियन सैन्याने गेल्या 24 तासांत पूर्वेकडील डोनेस्तक, लुहान्स्क आणि खार्किव्ह, मध्य युक्रेनमधील निप्रोपेत्रोव्स्क, पोल्टावा आणि किरोव्होहराड आणि दक्षिणेकडील मायकोलिव्ह आणि खेरसन या आठ क्षेत्रांमध्ये गोळीबार केला. अहवालानुसार, खार्किव्हमध्ये शुक्रवारी झालेल्या हल्ल्यात नऊ नागरिकांचा मृत्यू झाला आणि 50 हून अधिक लोक जखमी झाले. तर, लगतच्या इतर भागात दोघांचा मृत्यू झाला. शुक्रवार आणि शनिवारी दक्षिणेत, मायकोलिव्हवर भयानक हल्ले झाले. राष्ट्रपती कार्यालयाने दिलेल्या माहितीनुसार, हवाई हल्ल्यात पाच जण ठार तर १५ जण जखमी झाले. प्रादेशिक विधिमंडळाच्या प्रमुख हन्ना जमाजीवा यांनी शनिवारी सांगितले की, गेल्या २४ तासांत झालेल्या हल्ल्यांमध्ये ३९ जण जखमी झाले आहेत. जमझीवा म्हणाले की, रशियन सैन्याने निवासी भागांनाही लक्ष्य केले.
शनिवारी टेलिव्हिजनवर युक्रेनच्या उपपंतप्रधान इरिना वेरेशचुक यांनी सांगितले की, सध्या रशियन सैन्याने 700 युक्रेनियन सैनिक आणि 1,000 हून अधिक नागरिक ओलीस ठेवले आहेत. निम्म्याहून अधिक नागरिक महिला आहेत. वेरेशचुक म्हणाले की कीव्ह बंदिवान सैनिकांची देवाणघेवाण करू इच्छित आहे, कारण युक्रेनकडे तितकेच रशियन सैन्य आहे. ते म्हणाले की, नागरिकांना कोणत्याही अटींशिवाय सोडण्याची त्यांची मागणी आहे.