किरीट सोमय्यांचे स्थायी समितीचे अध्यक्ष यशवंत जाधवांवर गंभीर आरोप


मुंबई – राज्य सरकारमधील मंत्र्यावर आरोप करणाऱ्या भाजपच्या किरीट सोमय्या यांच्या रडारावर आता मुंबई महानगरपालिका आली आहे. आता शिवसेनेचे मुंबई महापालिकेतील स्थायी समिती अध्यक्ष यशवंत जाधव किरीट सोमय्या यांच्या रडावर आहेत. सोमय्या यांनी काही दिवसांपूर्वी यशवंत जाधव यांच्याशी संबंधित मोठा घोटाळा लवकरच उघड करणार असल्याची प्रतिक्रिया दिली होती. त्यानंतर आता किरीट सोमय्या यांनी यशवंत जाधव आणि त्यांच्या कुटुंबियांवर गंभीर आरोप केले आहेत.

मुंबई महानगर पालिका ही शिवसेनेसाठी कमाईचे साधन आहे. कोरोनाकाळात यांनी केलेले शेकडो कोटींचे घोटाळे मी आता मुंबईकरांसमोर मांडण्यास सुरुवात करत आहे. पवार ठाकरेंनी मंत्रालयामध्ये लुटायचे कसे यासाठी शिबीर आयोजित केल्याचे दिसते. १५ कोटी रुपये मुंबई महापालिकेचे स्थायी समिती अध्यक्ष यशवंत जाधव यांनी रोख स्वरुपात मनी लॉन्ड्रिंग करणाऱ्या उदय शंकर महावारला दिले आहेत. प्रधान डिलर प्रा. लिमिटेडच्या खात्यात हे पैसे जमा करण्यात आले. या कंपनीचा एक रुपयांचा शेअर आणखी पाच कंपन्यांनी पाचशे रुपये दराने घेतला. हे सर्व बोगस होते. त्यानंतर यशवंत जाधव आणि त्यांच्या कुटुंबाच्या खात्यामध्ये हे पंधरा कोटी जमा झाले. यशवंत जाधव यांनी त्यानंतर हे पैसे संयुक्त अरब अमिराती येथे हलवल्यामुळे १५ कोटी रुपये रोख यशवंत जाधव यांनी दिले हे स्पष्ट होत असल्याचा आरोप किरीट सोमय्या यांनी केला.

आता अनिल परब यांचा नंबर लागणार आहे. रिसॉर्ट बांधल्यानंतर ते मालमत्ता कर भरत होते. पण आयकर रिटर्नमध्ये रिसॉर्ट दाखवलेच नाही. पण ही सगळी ट्रेनिंग देणारे पवार आणि ठाकरे महापालिकेला का लुटत आहेत? यशवंत जाधव यांच्याबाबत संबधित विभागाकडे आम्ही तक्रारी केल्या आहेत. आयकर विभाग आणि ईडीने याची चौकशी करावी अशी आमची मागणी आहे, असे किरीट सोमय्या म्हणाले. दरम्यान, आधी महापालिकेत मोठा घोटाळा झाल्याचे म्हणत किरीट सोमय्या यांनी यशवंत जाधव यांनी कोट्यवधी रुपयांची मनी लॉन्ड्रिंग केली आहे. त्याचे पुरावे आयकर विभागाच्या हाती लागले आहेत. जाधव यांचे पितळ उघडे करण्यासाठी आयकर विभागाला पाठपुराव्यास मदत करणार असल्याचे म्हटले होते.