अनाथांचे छत्र हरपले, सिंधुताई सपकाळ यांचे वयाच्या ७३ व्या वर्षी निधन


पुणे – वयाच्या ७३ व्या वर्षी अनाथांची माय अशी ओळख असलेल्या ज्येष्ठ सामाजिक कार्यकर्त्या सिंधुताई सपकाळ यांनी अखेरचा श्वास घेतला. पुण्यातील गॅलक्सी रूग्णालयात त्यांच्यावर उपचार सुरू होते. आज (४ जानेवारी) रात्री ८ वाजून १० मिनिटांनी सिंधुताई सपकाळ यांचे गॅलेक्सी रुग्णालयात हृदय विकाराच्या झटक्याने निधन झाले. काही दिवसापूर्वी त्यांच्यावर शस्त्रक्रिया देखील झाली होती, अशी माहिती डॉ. शैलेश पुणतांबेकर यांनी दिली.

बुधवारी (५ जानेवारी) दुपारी १२ वाजता सिंधुताई यांच्या पार्थिवावर अंत्यसंस्कार करण्यात येणार आहे. त्या अगोदर हडपसर येथील त्यांच्या संस्थेत नागरिकांना अंत्यदर्शनासाठी पार्थिव ठेवले जाणार आहे. सिंधुताई यांच्या निधनाची बातमी येताच सर्वच स्तरातून दुःख व्यक्त केलं जात आहे. तसेच त्यांना भावपूर्ण आदरांजली वाहिली जात आहे. वर्धा येथे सिंधुताई सपकाळ यांचा जन्म झाला. घरात मुलगी नको असताना त्यांचा जन्म झाल्यामुळे त्यांच्या वाट्याला उपेक्षाच आली. त्यांना मराठी शाळेत चौथीपर्यंतच शिकता आले. वयाच्या नवव्या वर्षी त्यांचे लग्न करून देण्यात आले. मात्र, त्यानंतरही त्यांचा संघर्ष सुरूच राहिला.

सिंधुताई यांनी पुढे १९९४ मध्ये पुणे जिल्ह्यातील पुरंदर तालुक्यातील कुंभारवळण गावात ममता बाल सदन संस्था सुरू केली. स्वतःची मुलगी ममताला त्यांनी दगडूशेठ हलवाई संस्थेच्या माध्यमातून सेवासदन येथे शिक्षणासाठी दाखल केले. तसेच स्वतः इतर अनाथ आणि बेवारस मुलांचा सांभाळ करत आधार दिला. या ठिकाणी त्यांनी लहान मुलांच्या पालनपोषणासह शिक्षणाचीही जबाबदारी स्विकारली.

अनाथ मुलांना जेवण, कपड्यासह इतर अनेक सुविधा सिंधुताई सपकाळ यांच्या संस्थेकडून दिल्या जायच्या. या कामासाठी लोकही सढळ हाताने मदत करायचे. याशिवाय मुलांना शिक्षण पूर्ण झाल्यावर आर्थिकदृष्ट्या स्वावलंबी होण्यासाठी देखील मार्गदर्शन केले जात होते. आर्थिकदृष्ट्या स्वावलंबी झाल्यावर या अनाथ मुलांना जोडीदार शोधणे आणि लग्न करणे यातही सिंधुताई सपकाळ यांचा सक्रीय सहभाग होता.