आरबीआयची इंटरनेटशिवाय डिजीटल व्यवहारांना मंजुरी


नवी दिल्ली – ऑफलाइन डिजीटल पेमेंट्सबाबत भारतीय रिझर्व्ह बँकेने महत्त्वाचा निर्णय घेतला आहे. आता ऑफलाइन पद्धतीने गावांमध्ये आणि दुर्गम भागांत डिजिटल व्यवहार होणार आहे. ऑफलाइन पेमेंटनुसार सध्या 200 रुपयांच्या व्यवहाराला मंजुरी देण्यात आली आहे.

आरबीआयने म्हटले की, 200 रुपयांचे कमाल 10 व्यवहार म्हणजे 2000 रुपयांपर्यंतचे ऑफलाइन डिजिटल व्यवहार करता येणार आहे. डिजिटल पेमेंट्सला आरबीआयच्या या निर्णयामुळे प्रोत्साहन मिळणार असून डिजिटल इंडियाच्या दिशेने पुढे जाण्यास मदत मिळणार आहे. देशातील काही भागांमध्ये ऑफलाइन पेमेंट प्रायोगिक तत्वावर करण्यात आला होता. त्यावर लोकांनी दिलेल्या प्रतिक्रियेच्या आधारे हा निर्णय घेण्यात आला आहे. ऑफलाइन पेमेंटची आवश्यकता खेडेगावात अधिक आहे.

रिझर्व्ह बँकेने म्हटले की, ऑफलाइन पेमेंटमुळे कमकुवत इंटरनेट कनेक्टिविटी असलेल्या गावांना फायदा होणार आहे. यामुळे डिजिटल व्यवहाराला प्रोत्साहन मिळणार आहे. ऑफलाइन पेमेंटचा वापर ग्राहकाच्या मंजुरीनंतर करण्यात येऊ शकतो. या प्रकारच्या व्यवहाराला ‘अॅडिशन फॅक्टर ऑफ ऑथेंटिकेशन’ची आवश्यकता राहणार नाही. ऑफलाइन पेमेंट असल्यामुळे ग्राहकांना एसएमएस अथवा ई-मेल द्नारे मिळणारा मेसेज काही वेळेनंतर मिळणार आहे.