शरीरसंबंध ठेवल्यानंतर लग्नाला नकार देणे फसवणूक नसल्याचे म्हणत उच्च न्यायालयाकडून प्रियकाराची निर्दोष मुक्तता


मुंबई – बऱ्याच कालावधीसाठी परस्पर संमतीने शारीरिक संबंध ठेवल्यानंतर लग्नाला नकार दिल्यास त्याला फसणूक म्हणता येणार नसल्याचा निकाल मुंबई उच्च न्यायालयाने दिला आहे. एका प्रकरणामध्ये कनिष्ठ न्यायालयाने तरुणाला दोषी ठरवल्यानंतर उच्च न्यायालयाने तो निर्णय बदलला आहे. प्रेयसीने या प्रकरणामध्ये तिच्या प्रियकराविरोधात याचिका दाखल केली होती. लग्नाचे आश्वासन देऊन प्रियकराने शरीरसंबंध ठेवल्यानंतर लग्नाला नकार दिल्याचा आरोप तरुणीने केला होता.

पालघरमध्ये राहणाऱ्या या तरुणाला मुलीच्या तक्रारीनंतर पोलिसांनी कलम ३७६ आणि ४१७ अंतर्गत बलात्कार आणि फसणुकीच्या आरोपाखाली गुन्हा दाखल केला होता. १९ फेब्रुवारी १९९९ रोजी अतिरिक्त सत्र न्यायालयातील न्यायामुर्तींनी या प्रकरणामध्ये प्रियकराला बलात्काराच्या आरोपामधून निर्दोष मुक्त केले. पण या प्रियकराला फसवणुकीच्या आरोपाखाली दोषी ठरवण्यात आले होते.

काशीनाथ घरत असे या प्रकरणामधील प्रियकराचे नाव आहे. तीन वर्ष त्याच्या प्रेयसीला लग्नाचे आश्वासन देऊन काशीनाथने शरीर संबंध ठेवले. पण नंतर त्याने लग्नाला नकार दिला. या प्रकरणात गुन्हा दाखल झाल्यानंतर सुनावणीदरम्यान काशीनाथला दोषी ठरवून एक वर्ष सक्त मजुरीची शिक्षा सुनावण्यात आली. या प्रकरणी काशीनाथने उच्च न्यायालयामध्ये आव्हान दिले होते. न्यायमुर्ती अनुजा प्रभुदेसाई यांच्या एकल खंडपीठासमोर या प्रकरणाची सुनावणी झाली.

काशीनाथला फसवणुकीच्या आरोपामधूनही न्यायालयाने मुक्त केले आहे. सर्व साक्षी, पुरावे, जबाब आणि युक्तीवाद ऐकून घेतल्यानंतर काशीनाथ आणि ही महिला तीन वर्षांपासून रिलेशनशीपमध्ये असल्याचे स्पष्ट झाले. तसेच या महिलेने दिलेल्या जबाबावरुन तिची फसवणूक करुन तिच्यासोबत शरीर संबंध ठेवल्याचे दिसून आले नसल्याचे निरिक्षणही न्यायालयाने नोंदवले. म्हणजेच परस्पर संमतीने या दोन्ही सज्ञान व्यक्तींनी संबंध ठेवले होते.

संपूर्ण युक्तीवाद ऐकून घेल्यानंतर या प्रकरणात आरोपी असणाऱ्या प्रियकराने खोटी माहिती किंवा फसवणूक करुन शरीर संबंध ठेवल्याचे दिसून आले नसल्यामुळे एवढ्या मोठ्या कालावधीसाठी नात्यामध्ये राहून शरीर संबंध ठेवल्यानंतर लग्नाला नकार दिल्यास त्याला फसवणूक म्हणता येणार नसल्याचे न्यायालयाने म्हटले.

आपला निकाल देताना मुंबई उच्च न्यायालयाने वरिष्ठ न्यायालयामधील निकालाचे दाखलेही दिले. अशा प्रकरणांमध्ये आरोपीने खोटी माहिती देऊन महिलेला लग्नाचे आमिष दाखवले किंवा आश्वासन दिले हे सिद्ध होणे गरजेचे असते. आधी खोट्या माहितीच्या आधारे आश्वासने दिली आणि नंतर ती पूर्ण केली नाही, तर त्याला फसवणूक म्हणता येईल, असेही न्यायालयाने म्हटले.