कर्नाटकातील हिणकस आणि विकृत मनोवृत्तीचा बिमोड करण्यासाठी पंतप्रधानांनी स्वतः यात लक्ष घालावे – उद्धव ठाकरे


मुंबई – केवळ आमचेच नाहीत, तर सगळ्या देशाचे छत्रपती शिवाजी महाराज दैवत आहेत. त्यांचा अवमान तर दूर, कणभर अनादरही खपवून घेणार नाही. कर्नाटकातील मराठी जनतेवरील कानडी अत्याचार थांबवून या हिणकस आणि विकृत मनोवृत्तीचा बिमोड करण्यासाठी पंतप्रधानांनी क्षणाचाही विलंब न लावता यात स्वतः लक्ष घालावे आणि तेथील राज्य शासनाला त्वरित संबंधितांवर कडक कारवाई करण्यास सांगावे, अशा तीव्र शब्दांत मुख्यमंत्री उद्धव ठाकरे यांनी आपल्या भावना व्यक्त केल्या.

उद्धव ठाकरे म्हणाले, छत्रपती शिवाजी महाराज यांच्या पुतळ्याबाबत बंगळुरूमध्ये अघटीत घडले आहे, तर त्याची कसून चौकशी करायलाच हवी. या प्रकाराकडे डोळेझाक करू नका. गेले कित्येक वर्ष कर्नाटकातील मराठी बांधवांवर अत्याचार केला जात आहे आणि आता तर शिवरायांसारख्या आपल्या आराध्य दैवताची विटंबना करण्याची घटना घडते आणि तेथील सरकार याकडे डोळेझाक करते हे दुर्दैवी आहे.

वाराणसीत नुकतेच काशी विश्वेश्वराच्या मंदिरात पंतप्रधानांनी आपल्या भाषणात जेव्हा जेव्हा देशाची संस्कृती चिरडण्याचा प्रयत्न झाला, तेव्हा छत्रपती शिवाजी महाराजांसारखे पराक्रमी राजे निर्माण झाले, असे कौतुकोद्गार काढले होते. या कार्यक्रमास काही दिवस झाले नाही, तोच भाजप शासित कर्नाटकात याच शिवरायांची विटंबना होते आणि कुणावर कारवाई न करता उलट मराठी माणसाचा आवाज दाबण्याचा प्रयत्न होतो, हे अतिशय निंदनीय आणि अवमानकारक असल्याचे उद्धव ठाकरे यांनी सांगितले.

राज्यात कुणाचेही सरकार असो, पण दैवते बदलत नाहीत. आता पंतप्रधानांनी हा कानडी अत्याचार बंद करण्यासाठी क्षणाचाही विलंब न लावता तातडीने तेथील राज्य सरकारला आदेश द्यावेत व या विकृत मनोवृत्तीचा बिमोड करण्यास सांगावे, अशी मागणी उद्धव ठाकरे यांनी पंतप्रधान मोदींकडे केली आहे.

उद्धव ठाकरे पुढे म्हणाले, मराठी भाषिकांची बेळगावात गळचेपी करायची. सनदशीर मार्गाने सीमाप्रश्नी लढा देत असलेल्या मराठी भाषिकांवर कन्नड कर्मठांकडून हल्ला करायचे. असे भ्याड प्रकार थांबविण्याऐवजी त्याला खतपाणी घालायचे हे चालणार नाही. छत्रपतींचे नाव केवळ राजकारणासाठी घ्यायचे आणि आमच्या दैवताचा अनादर झाल्यावर मात्र बोटचेपी भूमिका घ्यायची. हे कदापिही खपवून घेतले जाणार नाही. मराठी अस्मितेला डिवचणे परवडणारे नाही, हे ध्यानात घ्यावे. केंद्र सरकारनेही यात दुतोंडी भूमिका सोडून ठोस पावले उचलावी, असेही मुख्यमंत्र्यांनी म्हटले आहे.