जितेंद्र आव्हाडांच्या एकुलत्या एक मुलीचा विवाहसोहळा रजिस्टर पद्धतीने संपन्न


मुंबई – राष्ट्रवादी काँग्रेसचे नेते आणि राज्याचे गृहनिर्माण मंत्री जितेंद्र आव्हाड यांच्या मुलीचा विवाहसोहळा नुकताच पार पडला आहे. एकीकडे राज्यातील अनेक बडे नेते मोठ्या थाटामाटात आपल्या मुलांची लग्ने लावत असताना अत्यंत साध्या पद्धतीने लग्न करत जितेंद्र आव्हाड यांनी सर्वांसमोर आदर्श ठेवला आहे. रजिस्टर पद्धतीने करण्यात आलेल्या या लग्नात काही मोजकेच पाहुणे उपस्थित होते.

रजिस्टर पद्धतीने जितेंद्र आव्हाड यांची एकुलती एक कन्या नताशा आव्हाड आणि एलन पटेल यांचा विवाहसोहळा पार पडला. बँडबाजा, वरात असा कोणताही गाजावाजा न करता अत्यंत साध्या पद्दतीने पार पडलेल्या या लग्नाची सध्या राजकीय वर्तुळात चर्चा सुरु आहे. यानिमित्ताने जितेंद्र आव्हाड यांनी इतर लोकप्रतिनिधींसमोर आदर्श ठेवला आहे.

जितेंद्र आव्हाड मुलीच्या विवाहसोहळ्यानंतर बोलताना भावूक झाल्याचे पहायला मिळाले. २५ वर्ष आपल्या अंगा-खांद्यावर खेळलेली मुलगी आपल्या घरात नसणार ही भावना खूप वेदनादायी असल्याचे सांगताना त्यांना अश्रू आवरत नव्हते. एका बापाने अशावेळी काय बोलायचे? असे सांगताना ते भावूक झाल्याचे पहायला मिळाले. कितीही मन कठोर करण्याचा प्रयत्न केला तरी ते होत नाही, कारण घरात दिसणारी, बागडणारी, कधीतरी अंगावर धावून येणारी, ओरडणारी आता घरात नसणार…घरातील घरपण गेल्यासारखे असेल, हे अशा भावना यावेळी त्यांनी व्यक्त केल्या.