ओमिक्रॉनविषयी तुम्हाला पडलेल्या ‘या’ 5 प्रश्नांना केंद्र सरकारचे उत्तर


नवी दिल्ली – कोरोनाच्या नव्या ओमिक्रॉन व्हेरिएंटमुळे जगभरातील नागरिकांच्या काळजीत वाढ झाली आहे. त्यामुळे या व्हेरिएंटविषयी अनेक प्रश्न सर्वसामान्य नागरिकांना पडत आहेत. या व्हेरिएंटमुळे कोरोनाची तिसरी लाट येणार का, आधीची लस या व्हेरिएंटचा सामना करू शकणार का, यापासून बचावासाठी काय करावे हे आणि असे अनेक प्रश्न विचारले जात आहेत. दरम्यान केंद्र सरकारच्या आरोग्य विभागाने अशाच ५ प्रश्नांचे शंकासमाधान केले आहे.

पहिल्या प्रश्नानुसार आरोग्य मंत्रालयाने सांगितले, ओमिक्रॉन व्हेरिएंटची लागण झालेल्या बाधितांच्या संख्येमध्ये जगभरात वाढ होत आहे. यात दक्षिण अफ्रिकेबाहेरील देशांचाही समावेश आहे. त्यामुळे भारतासह इतर देशांमध्ये या व्हेरिएंटचा प्रादुर्भाव होण्याची शक्यता आहे. असे असले तरी या व्हेरिएंटच्या संसर्गाचा दर आणि त्याचा धोका स्पष्ट अद्याप झालेला नाही. कोरोना विरोधी लसीकरणही भारतात वेगात होत आहे. त्यामुळे या व्हेरिएंटचा धोकाही काही प्रमाणात कमी होईल. पण, त्याबाबत अजून वैज्ञानिक तथ्य समोर येत आहेत.

दरम्यान ओमिक्रॉनचा सामना सध्याची कोरोना विरोधी लस करू शकणार नाही असा कोणताही पुरावा समोर आलेला नाही. या व्हेरिएंटच्या स्पाईकवरील काही बदल हे लसीची परिणामकारकता काही प्रमाणात कमी करू शकतात. असे असले तरी लसीची सुरक्षा प्रतिजीव आणि पेशींची रोगप्रतिकारकता यावर आहे. त्यामुळे ही रोगप्रतिकारकता सुरक्षित राहील. त्यामुळेच या लसी गंभीर आजारांसाठी सुरक्षा देईन. त्यामुळे पात्र असलेल्या सर्वांनी लस घ्यावी.

आरोग्य मंत्रालयाने पुढे सांगितले की, व्हेरिएंटच्या रचनेतील बदल, संसर्गाचा अधिक वेग आणि रोग प्रतिकारक शक्तीला भेदण्याची शक्यता या निकषांवर ओमिक्रॉन ‘व्हायरस ऑफ कन्सर्न’ म्हणून घोषित आहे. यामुळे कोरोना होऊन गेलेल्या लोकांनाही पुन्हा कोरोना होऊ शकतो. असे असले तरी या व्हेरिएंटबाबतचे अधिक तपशील येणे बाकी आहे.

ओमिक्रॉन व्हेरिएंटचा संसर्ग होऊ नये म्हणून प्रत्येकाने मास्कचा वापर करणे अत्यावश्यक आहे. याशिवाय कोरोनाविरोधी लसीचे दोन्ही डोस घ्या. शारीरिक अंतराच्या नियमाचे पालन करा आणि शक्य तितक्या मोकळ्या हवेशीर ठिकाणी थांबा, असा सल्ला केंद्रीय आरोग्य मंत्रालयाने दिला आहे.

आरोग्य मंत्रालयाने पुढे सांगितले की सध्या वापरात असलेल्या कोरोनाच्या आरटीपीसीआर चाचणीत ओमिक्रॉन व्हेरिएंटचे काही जीन्स सापडतात. यात स्पाईक्स, एनव्हलप, न्युक्लिओप्सिड यांचा समावेश आहे. असे असले तरी ओमिक्रॉनमधील एस जीनच्या रचनेत मोठ्या प्रमाणात बदल झाल्यामुळे त्याचा शोध सध्याच्या चाचण्यांमध्ये लावता येत नसल्यामुळे अशा चाचण्यांमध्ये एस जीन नसल्याचे दर्शवले जाऊ शकते. त्यामुळे या एस जीनचा वापर ओमिक्रॉनच्या चाचणीसाठी होऊ शकतो. पण, त्यासाठी ओमिक्रॉनच्या ‘जेनेटिक जिनोमिक सेक्वेन्सिंग’ समजणे गरजेचे आहे.