दावा : कोरोना संसर्गावर Chewing Gum 95% परिणामकारक


जगभरात कोरोना प्रादुर्भावावर नियंत्रण मिळविण्यासाठी प्रयत्न सुरु आहेत. कोरोनावर आतापर्यंत तरी लस हाच एकमेव उपाय असल्याचे सांगितले जात होते. पण, आता च्युईंग गम हा सुद्धा कोरोनाचा प्रादुर्भाव रोखू शकतो, असा दावा केला जातो आहे. विशिष्ट पद्धतीने बनविण्यात आलेला च्युईंग गम तोंडामधील कोरोना पार्टीकल्सचा ट्रॅप करतो आणि हा च्युईंग गम 95% प्रभावी ठरतो असा दावाही वैज्ञानिकांनी केला आहे.

हा दावा वैज्ञानिकांनी करताना म्हटले आहे की, विशिष्ट पद्धतीने बनविलेले हे च्युईंग गम एखाद्या जाळीप्रमाणे काम करते. ज्या पद्धतीने जाळी टाकून एखादा प्राणी, वस्तू, कीटक पकडला जातो, त्याच पद्धतीने च्युईंग गम कोरोना पार्टीकल्स पकडतो. प्रामुख्याने च्युईंग गम खाताना तोंडात निर्माण होणारी थुंकी कोरोना पार्टिकल्स नियंत्रणात ठेवण्यास मदत करते. कोरोना पार्टीकल्स जर नियंत्रणात राहिले, तर कोरोना होण्याचा धोका बऱ्याच अंशी कमी होतो. प्रामुख्याने कोरोना संक्रमित व्यक्ती जेव्हा बोलतो, तेव्हा त्याच्या तोंडातून ड्रॉपलेट्स (हवेच्या माध्यमातून प्रसार होऊ शकतील असे तोंडातील, नाकातील द्रव्याचे छोटे थेंब) हवेत पसरतात. या ड्रॉपलेट्सच्या माध्यातून होणारा कोरोना रोखण्यास हा च्युईंग गम फायदेशीर ठरतो, असा वैज्ञानिकांचा दावा आहे.

दरम्यान याबाबत आंतरराष्ट्रीय प्रसारमाध्यमांनी दिलेल्या वृत्तानुसार, या च्युईंग गमची निर्मिती पेनसिल्व्हेनिया विद्यापिठातील संशोधकांच्या एका गटाने केली आहे. हे च्युईंग गम सर्वसामान्य च्युईंग गम प्रमाणेच आहे. याबाबतची माहिती मॉलिक्युलर थेरपीच्या अहवालात देण्यात आली आहे. हे च्युईंग गम तापमानाला सर्वसामान्य ठेवता येतो. सामान्य तापमानाचा एसीईटू प्रोटीन मॉलिक्युल्सवर (जो च्युईंग गममध्ये आहे) काहीही विशेष परिणाम होत नाही.

च्युईंग गमबाबत केले जात असलेले दावे

  • हे च्युईंग गम विशिष्ट पद्धतीचे आहे.
  • च्युईंग गममध्ये एसीईटू प्रोटीनचे घटकांचा समावेश
  • शरीरांच्या पेशीच्या पृष्ठभागावर हे प्रोटीन्स आढळतात
  • कोरोनाचे विषाणू पेशींना संसर्ग करताना हा च्युईंगम पेशींचे करतो संरक्षण
  • च्युईंग गमला कोरोनाशी संबंधित घटक चिकटतात
  • च्युईंग गम 95% प्रभावी असल्याचा दावा