कपिल देव यांनी शेअर केला रणवीर सिंगच्या आगामी ‘83’ चित्रपटाचा ट्रेलर


बॉलिवूड आणि भारतीय क्रिकेट चाहत्यांमध्ये बहुप्रतिक्षित ’83’ चित्रपटाचा ट्रेलर लॉन्च झाल्यानंतर आनंदाचे वातावरण आहे. अभिनेता रणवीर सिंग १९८३च्या विश्वचषकात भारताच्या विजयावर आधारित या चित्रपटात कर्णधार कपिल देव यांची भूमिका साकारत आहे. भारतीय संघाने इतिहास घडवण्यासाठी वेगवेगळ्या अडचणींवर मात कशी केली, हा चित्रपट यावर केंद्रित आहे. भारताचा माजी कर्णधार कपिल देव यांनीही आपल्या सोशल मीडिया अकाऊंटवर चित्रपटाचा ट्रेलर शेअर करताना ‘माझ्या संघाची कहाणी’ असे अभिमानाने म्हटले आहे.

भारताच्या ऐतिहासिक १९८३ क्रिकेट विश्वचषक विजयाभोवती कबीर खान दिग्दर्शित ’83’ ची कथा फिरते. भारतीय संघाने २५ जून १९८३ रोजी लंडनमधील लॉर्ड्सच्या मैदानावर विश्वचषक जिंकत इतिहास रचला. या चित्रपटाचा टीझर काही दिवसांपूर्वी प्रदर्शित झाला होता. तो पाहिल्यावर चाहत्यांमध्ये चित्रपटाबाबतची उत्सुकता शिगेला पोहोचली होती.


भारतीय संघाने लॉर्ड्स मैदानात रचलेला इतिहास पुन्हा नव्याने जगण्याची संधी या चित्रपटाद्वारे मिळणार आहे. त्यामुळे चाहत्यांमध्ये चित्रपटाबाबत उत्सुकता आहे. आता चित्रपटाचा ट्रेलर प्रदर्शित झाला असून सोशल मीडियावर चर्चेत आहे. ३ मिनिटे ४९ सेकंदाच्या ट्रेलरमध्ये १९८३ साली झालेल्या लंडनमधील लॉर्ड्स मैदानातील भारत विरुद्ध वेस्ट इंडिज सामना दाखवण्यात आला आहे. विश्वचषक जिंकण्यासाठी भारतीय संघाचे कर्णधार कपिल देव यांनी केलेली तयारी दाखवण्यात आली आहे. तसेच भारतीय संघाला ज्या प्रकारे वागणूक देण्यात आली ते दाखवणारा हा ट्रेलर आहे.

रणवीर सिंग, एमी विर्क, चिराग पाटील, साकीब सलीम, ताहिर भसीन, जतिन सरना, जीवा, आदिनाथ कोठारे, साहिल खट्टर, पंकज त्रिपाठी हे कलाकार चित्रपटाच्या टीममध्ये मुख्य भूमिकेत झळकणार आहेत. तसेच अभिनेत्री दीपिका पादूकोण कपिल देव यांच्या पत्नी रोमी यांच्या भूमिकेत दिसणार आहे. आता चाहते चित्रपटाच्या प्रदर्शनाची आतुरतेने वाट पाहात आहेत. २४ डिसेंबर रोजी ’83’ हा चित्रपट चित्रपटगृहांमध्ये प्रदर्शित होणार आहे.