५० टक्क्यांपर्यंत महाग होणार अ‍ॅमेझॉन प्राइमची मेंबरशिप


नवी दिल्ली – एअरटेल आणि व्होडाफोन आयडियानंतर आता अ‍ॅमेझॉन प्राइम मेंबरशिप देखील महाग होणार आहे. भारतात पाच वर्षांपूर्वी अ‍ॅमेझॉन प्राइम आले होते. अ‍ॅमेझॉन प्राइमचे अल्पावधीत अनेकजण मेंबर झाले आहेत. हे अ‍ॅप मनोरंजन, चित्रपट, वेब सीरिज यामुळे तरुणांमध्ये लोकप्रिय आहे. पण अ‍ॅमेझॉन प्राइम मेंबरशिप आता ५० टक्क्यांपर्यंत महाग होणार आहे. १३ डिसेंबर २०२१ पासून वाढीव रुपये लागू होणार आहेत. सध्या ९९९ रुपये वार्षिक मेंबरशिप असलेले पॅकेज १,४९९ रुपये होणार आहे. वार्षिक सभासदत्वाची किंमत ५०० रुपयांनी वाढणार आहे. मासिक आणि त्रैमासिक सब्सक्रिप्सनवरही याचा परिणाम होईल. नव्या अपडेटनंतर अ‍ॅमेझॉन प्राइम मेंबरशिपसाठी ९९९ रुपयांच्या पॅकची किंमत १,४९९ रुपये असेल. त्याची वैधता १२ महिने आहे. त्याच वेळी, ३२९ रुपयांच्या तिमाही प्लॅनची ​किंमत ४५९ रुपये असेल आणि १२९ रुपयांच्या मासिक प्लॅनची ​​किंमत १७९ रुपये असेल.

विशेष ऑफर अ‍ॅमेझॉन प्राइम मेंबरशिप असलेल्या ग्राहकांना मिळतात आणि सेल दरम्यान इतर ग्राहकांआधी खरेदी करण्याची संधी मिळते. याशिवाय अ‍ॅमेझॉन प्राइम व्हिडिओ, अ‍ॅमेझॉन म्युझिक, प्राईम रिडिंग आणि प्राईम गेमिंग देखील उपलब्ध आहेत. मे २०२१ पासून प्राइम युथ ऑफरचा भाग असलेल्या १८ ते २४ वयोगटातील ग्राहकांसाठी अ‍ॅमेझॉन प्राईमच्या किंमती बदलणार आहे. तथापि, नवीन अपडेटनंतर, तरुण ग्राहकांना फायदा होणार आहे, कारण तरुण ग्राहकांसाठी मासिक आणि त्रैमासिक प्राइम मेंबरशिपची किंमत १६४ रुपयांवरून ६४ रुपये आणि २९९ रुपयांवरून ८९ रुपये आणि वार्षिक फी ७४९ रुपयांवरून ४९९ रुपये करण्यात आली आहे.