मुंबईत शरद पवारांच्या उपस्थितीत गृहमंत्र्यांची महत्त्वपूर्ण बैठक


मुंबई – आर्यन खान प्रकरण, एनसीबीची कारवाई, राष्ट्रवादी काँग्रेसचे प्रवक्ते नवाब मलिक यांच्या पत्रकार परिषदा आणि समीर वानखेडेंवर करण्यात आलेले आरोप या सगळ्या घडामोडींमुळे गेल्या महिन्याभरापासून मुंबईतील वातावरण चांगलेच ढवळून निघाले आहे. आज सकाळपासून मुंबईत या पार्श्वभूमीवर दोन महत्त्वाच्या बैठका झाल्यामुळे राजकीय वर्तुळात चर्चांना उधाण आले आहे. शिवसेना प्रवक्ते आणि खासदार संजय राऊत यांनी सकाळी राष्ट्रवादी काँग्रेसचे अध्यक्ष शरद पवार यांची भेट घेतल्यानंतर शरद पवार यांच्या उपस्थितीत गृहमंत्री दिलीप वळसे पाटील यांच्या निवासस्थानी देखील एक महत्त्वाची बैठक झाली. तासभर झालेल्या या बैठकीत मुंबईचे पोलीस आयुक्त हेमंत नगराळे देखील उपस्थित असल्यामुळे यातून वेगवेगळे तर्क काढले जात आहेत.

दरम्यान आज संजय राऊतांनी अचानक शरद पवारांची सिल्व्हर ओकवर जाऊन भेट घेतल्यामुळे सगळ्यांच्याच भुवया उंचावल्या आहेत. त्यापाठोपाठ शरद पवारांनी थेट राज्याचे गृहमंत्री दिलीप वळसे पाटील यांचे निवासस्थान गाठले आणि तिथे गृहमंत्र्यांसोबतच मुंबईचे पोलीस आयुक्त हेमंत नगराळे यांच्यासोबत तासभर बैठक झाली. त्यामुळे मुंबईत हालचाली वाढल्याचे चित्र दिसू लागले आहे. या बैठकीमध्ये नेमकी कशावर चर्चा झाली, याविषयी माहिती मिळू शकलेली नाही. सध्या एनसीबी विरुद्ध नवाब मलिक असा जो वाद सुरू आहे, या पार्श्वभूमीवर ही बैठक झाल्याची चर्चा सुरू झाली आहे. तसेच, देवेंद्र फडणवीस आणि नवाब मलिक यांच्या पत्रकार परिषदांच्या आधी ही बैठक झाल्यामुळे त्यावर चर्चा झाली असण्याची शक्यता वर्तवली जात आहे.