पाकिस्तानच्या कर्णधाराने विराट, रोहितला मागे ठकलत गाठले पहिले स्थान


दुबई – सध्या सुरू असलेल्या टी-२० विश्वचषकात आपल्या सनसनाटी कामगिरीनंतर पाकिस्तानचा स्टार कर्णधार बाबर आझम आणि श्रीलंकेचा फिरकीपटू वानिंदू हसरंगा हे जगातील अव्वल टी-२० फलंदाज आणि गोलंदाज बनले आहेत. विश्वचषक स्पर्धेमध्ये बाबर आझम फलंदाज आणि कर्णधार म्हणून चमकदार कामगिरी करत आहे. सलग चार सामने जिंकल्यानंतर, पाकिस्तान टी-२० वर्ल्ड २०२१ च्या उपांत्य फेरीत पोहोचणारा संघ बनला आहे. इंग्लंडच्या डेव्हिड मलानला मागे टाकत बाबरने टी-२० क्रमवारीत अव्वल स्थान पटकावले आहे.

केवळ टी-२० मध्येच नव्हे, तर एकदिवसीय क्रमवारीतही बाबर पहिल्या स्थानावर आहे. तो आधीच आयसीसी फलंदाजांच्या क्रमवारीत पहिल्या क्रमांकावर आहे. यावर्षी आझमने एप्रिलमध्ये भारतीय कर्णधार विराट कोहलीच्या पुढे क्रमवारीत अव्वल स्थान पटकावले होते. एकदिवसीय क्रमवारीत आझमचे ८७३ गुण आहेत, तर कोहली आणि रोहित शर्मा अनुक्रमे ८४४ आणि ८१३ गुण आहेत.

बाबर आझमने टी-२० विश्वचषक स्पर्धेमध्ये पाकिस्तानसाठी महत्त्वाची भूमिका बजावली आहे. त्याने चार डावात १२४.५२च्या स्ट्राईक रेटने ६६ च्या सरासरीने १९८ धावा केल्या आहेत. गेल्या आठवड्याच्या क्रमवारीत दुसऱ्या स्थानावर असलेल्या बाबरने १४ गुणांची आघाडी घेतली आणि डेव्हिड मलानला मागे टाकले. मलान ८३१ वरून ९९८ गुणांवर घसरला. जेसन रॉय सहा स्थानांनी प्रगती करत १४व्या, डेव्हिड मिलर सहा स्थानांनी प्रगती करत ३३व्या आणि दक्षिण आफ्रिकेचा कर्णधार टेंबा बावुमा ५२व्या स्थानावर पोहोचला आहे.

टी-२० क्रमवारीत तिसऱ्या स्थानावर ऑस्ट्रेलियाचा कर्णधार अॅरॉन फिंच आहे. पाकिस्तानचा मोहम्मद रिझवान टी-२० क्रमवारीत चौथ्या स्थानावर असून त्याचे ७३१ गुण आहेत. भारतीय कर्णधार विराट कोहली ७१४ गुणांसह पाचव्या स्थानावर आहे. या यादीत भारताचा लोकेश राहुल ६७८ गुणांसह आठव्या क्रमांकावर आहे.

श्रीलंकेचा वानिंदू हसरंगा टी-२० गोलंदाजी क्रमवारीत अव्वल स्थानावर आहे. वनिंदू हसरंगा हा एका कॅलेंडर वर्षात आंतरराष्ट्रीय टी-२० मध्ये सर्वाधिक विकेट घेणारा गोलंदाज आहे. टी-२० विश्वचषक स्पर्धेत तो उत्कृष्ट फॉर्ममध्ये आहे आणि १४ विकेट्ससह आघाडीवर आहे. ९ धावांत ३ बळी ही त्याची सर्वोत्तम कामगिरी आहे. या यादीत दक्षिण आफ्रिकेचा तबरेझ शम्सी ७७० गुणांसह दुसऱ्या क्रमांकावर असून तिसऱ्या क्रमांकावर इंग्लंडचा आदिल रशीद आहे. अफगाणिस्तानचा स्टार फिरकी गोलंदाज राशिद खान आणि मुजीब उर रहमान अनुक्रमे चौथ्या आणि पाचव्या क्रमांकावर आहेत.