उच्च न्यायालयाचा आर्यन खानला १ लाख रुपयांच्या बाँडसह ‘या’ १४ अटींवर जामीन


मुंबई – १ लाख रुपयांच्या व्यक्तीगत जातमुचलक्यासह १४ अटींवर प्रसिद्ध अभिनेता शाहरूख खानचा मुलगा आर्यन खानसह अरबाज मर्चंट आणि मुनमुन धमेचाला जामीन मंजूर करण्यात आला आहे. आज (२९ ऑक्टोबर) याबाबत सविस्तर निकालपत्र मुंबई उच्च न्यायालयाने दिले. न्यायालयाने जामीन देण्याचा गुरुवारी (२८ ऑक्टोबर) निर्णय दिला होता. त्यामुळे आता आज आर्यन खानसह तिघेही तुरूंगाच्या बाहेर येण्याची शक्यता आहे.

न्यायालयाने जामीन देताना घातलेल्या १४ अटी –

  • एक किंवा अधिक जामीनदारासह १ लाख रुपयांचा पी. आर. बाँड प्रत्येक आरोपीला द्यावा लागेल.
  • एनडीपीएस कायद्यानुसार आरोपींनी त्यांच्या विरोधात जे गुन्हे दाखल आहेत. त्या किंवा तशा इतर कोणत्याही कृतीमध्ये सहभागी होऊ नये.
  • या गुन्ह्यातील सहआरोपी किंवा इतर कोणत्याही व्यक्तीशी आरोपींनी प्रत्यक्ष किंवा अप्रत्यक्ष संपर्क साधू नये.
  • एनडीपीएस विशेष न्यायालयासमोर सुनावणी सुरू असलेल्या कोणत्याही गोष्टीत बाधा येईल अशा आरोपींनी कृती करू नये.
  • साक्षीदारांना आरोपीने स्वतः किंवा इतर कुणाच्या माध्यमातून प्रभावित करण्याचा प्रयत्न करू नये किंवा पुराव्यांशी छेडछाड करू नये.
  • आपले पासपोर्ट आरोपींनी तात्काळ विशेष न्यायालयाकडे जमा करावेत.
  • विशेष न्यायालयासमोर सुरू असलेल्या प्रकरणावर कोणत्याही प्रकारच्या माध्यमांसमोर आरोपींनी वक्तव्य करू नये.
  • आरोपींनी विशेष न्यायालयाकडून परवानगी घेतल्याशिवाय देश सोडून कुठेही जाऊ नये.
  • मुंबई बाहेर कुठेही आरोपींना जायचे असेल, तर त्यांना तपास अधिकाऱ्यांना याची माहिती द्यावी लागेल. तसेच तपास अधिकाऱ्यांना आपल्या प्रवासाचे सर्व तपशील द्यावे लागतील.
  • प्रत्येक शुक्रवारी सकाळी ११ ते दुपारी २ वाजण्याच्या दरम्यान आरोपींना एनसीबीच्या मुंबई कार्यालयात हजर रहावे लागेल.
  • न्यायालयातील प्रत्येक तारखेला आरोपींना हजर रहावे लागेल. याला केवळ विशेष परिस्थितीत अपवाद असेल.
  • एनसीबी तपासासाठी आरोपींना जेव्हा जेव्हा बोलावेल तेव्हा चौकशीसाठी हजर रहावे लागेल.
  • आरोपीने खटला सुरू झाल्यानंतर ही सुनावणी प्रलंबित होईल किंवा उशीर लागेल असे काहीही करू नये.
  • यापैकी कोणत्याही अटीचा भंग आरोपीने केल्यास एनसीबीला विशेष न्यायालयात जामीन रद्द करण्याचा अधिकार असेल.

दरम्यान वरिष्ठ वकील मुकुल रोहतगी म्हणाले, अरबाजकडे काही आहे की नाही याविषयी आर्यनला कोणतीही माहिती नव्हती. वादासाठी हे माहिती होते असे मानले तरी सामूहिकपणे व्यावसायिक स्तरावरील ड्रग्जची मात्रा सापडले एवढेच म्हणू शकता. एनसीबी त्याला षडयंत्र म्हणत आहे. आर्यनविरोधातील कलम २७ अ हटवण्यात आलेले नाही. आर्यनसोबतच्या ५-८ लोकांकडील ड्रग्जची बेरीज करून त्याला व्यावसायिक मात्रा म्हटले जाते.

एकूण १३०० लोक क्रुझ शिपवर हजर होते. असे असताना एनसीबीने केवळ आर्यन आणि अरबाजमध्येच संबंध असल्याचे सांगितले. हा षडयंत्राचा आरोप योगायोग नाही, तर कटाचा भाग आहे. जहाजावर कुणाच्याही भेटीगाठी झालेल्या नाहीत त्यामुळे याला षडयंत्र म्हणता येणार नाही. हे सर्व एकत्र भेटणार आहेत, तेथे त्यांना ड्रग्ज मिळणार आहे आणि मग ते ड्रग्जचे सेवन करणार आहेत अशी चर्चा नसल्यामुळेच हा कट आहे, असं मत रोहतगी यांनी व्यक्त केले.

एखाद्या हॉटेलमध्ये जर वेगवेगळ्या रूममध्ये लोक आहेत. त्यांनी ड्रग्जचे सेवन केले तर ते सर्व लोक षडयंत्राचा भाग आहेत असे म्हणता येईल का? या प्रकरणात षडयंत्र म्हणावे असा कोणताही पुरावा नाही. आर्यन केवळ अरबाजला ओळखत होता. याशिवाय इतर कुणालाही ओळखत नाही. तेथे सर्वांची भेट झाली हे सिद्ध करणे कठीण आहे. पण, वास्तवाकडे दुर्लक्ष करता येणार नाही. षडयंत्र आहे हे दाखवण्यासाठी बैठक किंवा भेट होणे गरजेचे आहे. तिथे जाणीवपूर्वक ६ ग्रॅम ड्रग्ज सोबत बाळगले असू शकते. त्याचा षडयंत्राशी काहीही संबंध नसल्याचेही मुकुल रोहतगी यांनी नमूद केले.