टेक्सास – कोरोनाचे संकट संपूर्ण जगावर असताना आता अमेरिकेतील टेक्सासमध्ये ‘मंकीपॉक्स’ व्हायरसचा रुग्ण आढळल्याने खळबळ उडाली आहे. अमेरिकेत यापूर्वी २००३ साली मंकीपॉक्सचे रुग्ण आढळून आले होते. अमेरिकेतील रोग नियंत्रक आणि प्रतिबंधक संस्थेने ही माहिती दिली आहे. डल्लासमधील रुग्णालयात मंकीपॉक्सबाधित व्यक्तीला दाखल करण्यात आले असून त्याला आयसोलेशनमध्ये ठेवण्यात आले आहे. रुग्णांने नायजेरियातून अमेरिकेत प्रवास केला होता. या रुग्णांच्या संपर्कात आलेल्या व्यक्तींना मंकीपॉक्सचा संक्रमण होण्याची शक्यता वर्तवण्यात येत आहे.
वैद्यकीय यंत्रणा या प्रकरणी तपासणी करत आहेत. ज्या विमानाने अमेरिकेत हा रुग्ण आला, त्या विमानातील प्रवाशांची माहिती घेतली जात आहे. रुग्णाने दोन विमाने बदलत अमेरिकेत प्रवेश केला होता. ८ जुलैला नायजेरियातील लागोसमधून अटलँटामध्ये आणि ९ जुलैला अटलँटामधून डल्लासमध्ये प्रवेश केला होता. सध्यातरी मंकीपॉक्सबाबत चिंता करण्याचे कारण नसल्याचे प्रशासनाकडून सांगण्यात आले आहे.
दरम्यान मंकीपॉक्स हा साथीचा आजार असून मंकीपॉक्सच आजाराचे पहिले प्रकरण १९७० साली पहिल्यांदा समोर आले होते. याबाबतची माहिती जागतिक आरोग्य संघटनेने दिली आहे. या आजाराचे रुग्ण आफ्रिकेतील ११ देशात आढळून आले होते. त्यानंतर २००३ साली पहिल्यांदा आफ्रिकेबाहेर अमेरिकेत मंकीपॉक्सचा रुग्ण आढळला होता. त्यानंतर १८ वर्षांनी मंकीपॉक्सचा रुग्ण आढळून आला आहे. २००३ साली घानावरून मागवण्यात आलेल्या पाळीव कुत्र्यामुळे अमेरिकेत संसर्ग पसरला होता. आतापर्यंत आशिया खंडात मंकीपॉक्सचा एकही रुग्ण आढळलेला नाही.
याचे संक्रमण मंकीपॉक्स झालेल्या प्राण्याच्या संपर्कात आल्यामुळे होते. पण याबाबत अजूनही वैज्ञानिकांना स्पष्ट माहिती नाही. ६ ते १३ दिवसात मंकीपॉक्सची लागण होते. काही लोकांना ५ ते २१ दिवसातही संसर्ग होण्याची शक्यता आहे. लागण झालेल्या व्यक्तीला ताप, डोकेदुखी, पाठ आणि मांसपेशींमध्ये दुखापत होते. त्याचबरोबर थकवा जाणवतो. त्याचबरोबर आजारी व्यक्तीच्या चेहरा आणि अंगावर मोठे फोड येतात. काही रुग्णांच्या डोळ्यावरही प्रभाव जाणवतो. मंकीपॉक्समुळे मृत्यूचे प्रमाण ११ टक्क्यांपर्यंत असू शकते. तर लहान मुलांना सर्वाधिक मृत्यूचा धोका आहे.
आतापर्यंत कोणतेही उपचार मंकीपॉक्सवर उपलब्ध नसल्याची माहिती जागतिक आरोग्य संघटनेने दिली आहे. लसीमुळे मंकीपॉक्स आटोक्यात येत असल्याचे दिसून आले आहे. यावर अजूनही संशोधन सुरु आहे. या आजारावर नियंत्रण मिळवण्यासाठी लोकांमध्ये जागरुकता असणे महत्त्वाचे आहे.