३०० कोटींपेक्षा जास्त बजेट असलेल्या ‘रामायण’मध्ये झळकणार ऋतिक-दीपिका

यासंदर्भात ‘स्पॉट बॉय’ने दिलेल्या वृत्तानुसार, कलाविश्वात आणि सोशल मीडियावर सध्या मधु मंटेना यांच्या ‘रामायण’ या चित्रपटाची जोरदार चर्चा सुरु आहे. प्रसिद्ध अभिनेत्री दीपिका पादुकोण आणि अभिनेता हृतिक रोशन या चित्रपटात मुख्य भूमिकेत झळकणार आहेत. ‘रामायण’ हा थ्रीडी चित्रपट असून याचे बजेट ३०० कोटींपेक्षा जास्त आहे. दीपिका पादुकोण ‘रामायण’ या चित्रपटात सीतेची भूमिका साकारणार आहे. तर हृतिक रोशन प्रभू श्रीराम यांच्या भूमिकेत पाहायला मिळणार आहे. नितेश तिवारी या चित्रपटाचे दिग्दर्शन करणार असल्याचे सांगण्यात येत आहे.

दरम्यान, दीपिका आणि हृतिक ही जोडी ‘रामायण’पूर्वी ‘फायटर’ या चित्रपटात एकत्र झळकणार आहे. या चित्रपटाची घोषणा अलिकडेच करण्यात आली आहे. हा चित्रपट देशभक्तीपर आधारित असून नुकताच त्याचा टीझर प्रदर्शित झाला आहे. या चित्रपटाचे दिग्दर्शन सिद्धार्थ आनंद करत आहे.