नवी दिल्ली – कोरोनाच्या उगम स्थानानंतर भारतातील लडाखमधील गलवाण क्षेत्रात चिनी लष्कराने केली घुसखोरी या पार्श्वभूमीवर देशात चिनी अॅप्सवर सुरक्षेच्या कारणास्तव बंदी घालण्यात आली आहे. बंदी घातलेल्या अॅप्समध्ये तरुणाईच्या गळ्यातील ताईत बनलेल्या टीक-टॉकचा देखील समावेश होता. त्यातच टीक-टॉक बंद झाल्यामुळे अनेकांचा हिरमोड झाला आहे. अशा परिस्थितीत टीक-टॉककडून देखील हालचाली सुरु झाल्या आहेत. कारण टीक-टॉकला भारतासारखी बाजारपेठ गमावणे परवडणारे नसल्यामुळे आपले चीनमधील मुख्यालय हलवण्याच्या हालचाली टीक-टॉकने सुरू केल्या आहेत. दुसऱ्या देशात मुख्यालय हलवून अॅपवर भारताकडून घालण्यात आलेली बंदी उठवण्यासाठी टीक-टॉक प्रयत्न करण्याची शक्यता आहे. यासंदर्भात लंडन आणि कॅलिफोर्निया या दोन पर्यायांवर टीकटॉकने काम करण्यास सुरुवात केल्याची माहिती मिळत आहे.

यासंदर्भात रॉयटर्सने दिलेल्या वृत्तानुसार यासंदर्भात लंडन प्रशासन आणि कॅलिफोर्निया प्रशासनासोबत टीक-टॉकची बोलणी सुरू आहेत. टीक-टॉकने हे पाऊल चीनपासून पूर्णपणे संबंध तोडण्यासाठी उचलल्याचे सांगितले जात आहे. दरम्यान, कोरोनाच्या प्रसाराच्या मुद्द्यावरून अमेरिका आणि चीनमधले संबंध तणावपूर्ण झाले असल्यामुळे टीक-टॉकची देखील अमेरिकन प्रशासनाकडून कसून चौकशी करण्यात येत आहे. चीनी सरकारने युजर्सची माहिती देण्यासंदर्भात टीक-टॉकवर दबाव टाकला असू शकतो, अशी शंका अमेरिकेला असल्यामुळे अमेरिकन प्रशासन अधिक सतर्क राहून चौकशी करत आहे. या पार्श्वभूमीवर कॅलिफोर्नियाऐवजी लंडनमध्येच टीक-टॉकचे मुख्यालय होण्याची दाट शक्यता आहे.

दरम्यान, मुख्यालय हलवल्यानंतर देखील भारतासोबतच ज्या ज्या देशांनी टीक-टॉकवर बंदी घातली आहे, त्या देशाकडून काय निर्णय घेतला जातो, यावर सारे काही अवलंबून असणार आहे. शिवाय, टीक-टॉक सुरू झाल्यानंतर देखील जुने युजर्स आणि त्यांच्या अकाऊंटवर असणारे लाखो फॉलोअर्स तसेच राहतील की पुन्हा शून्यापासून सुरूवात करावी लागेल, हे देखील अद्याप स्पष्ट होऊ शकलेले नाही.