केसांशी निगडीत समस्यांवर उपाय म्हणून मेहेंदी वापरण्याची पद्धत आपल्याकडे फार पूर्वीपासून चालत आली आहे. अगदी आजीपासून ते तरुण नातीपर्यंत सर्वच मुली आणि आता मुलेही केसांच्या आरोग्यासाठी मेहेन्दीचा वापर करणे पसंत करताना दिसतात. मेहेंदी वापरल्याने केसांवर रंग तर चढतोच, पण त्याशिवाय मेहेंदी मध्ये असलेली अनेक पोषक तत्वे केसांचे आरोग्य सुधारण्यास मदत करतात. पूर्वीच्या काळी, आणि अजूनही काही ठिकाणी मेहेंदीच्या झाडांची पाने वाटून तो लेप केसांना लावण्याची पद्धत होती. पण आजकाल मेहेंदीची पाने वाळवून त्यापासून तयार केलेली मेहेंदी पावडर बाजारामध्ये सहज उपलब्ध असते. ही मेहेंदी वापरण्याचे जसे फायदे आहेत, तसेच त्यापासून काही प्रमाणात नुकसान ही होऊ शकते.
मेहेंदी केसांच्या मुळांना मजबूत बनविते. मेहेंदीमध्ये मेथीदाण्याची पूड मिसळून हे मिश्रण केसांना लावल्यास केसगळती कमी होते. मेहेन्दीच्या वापरामुळे केस चमकदार, मुलायम होतात. मेहेंदी नैसर्गिक हेअर कंडीशनर आहे. केसांचे कंडीशनिंग करण्यासाठी मेहेंदीमध्ये अंडे किंवा दही घालून हे मिश्रण केसांना लावावे. अर्ध्या तासाने कोमट पाण्याने केस धुवून टाकावेत.
मेहेंदीच्या वापराने केसांमधील कोंडा कमी होण्यास मदत होते. मेहेंदीच्या नियमित वापराने केसांमधील कोंडा गायब होईलच, शिवाय पुन्हा होणारही नाही. मेहेंदीमध्ये असणारी अँटी फंगल आणि अँटी मायक्रोबियल तत्वे डोक्याची खाज कमी करण्यास मदत करतात. मेहेंदीचा सर्वसामान्य उपयोग केसांना डाय करण्यासाठी केला जातो. बाजारातील रसायन मिश्रित हेअर डाय वापरण्यापेक्षा मेहेन्दीचा वापर हा सुरक्षित पर्याय आहे.
मेहेंदी मध्ये असलेले टॅनिन केसांच्या कॉर्टेक्समध्ये शिरून केसांना मजबूत बनविते आणि केस मुलायम व चमकदार दिसू लागतात. तसेच केसांचा तेलकटपणा नियंत्रित ठेवण्यासही मेहेंदी उपयुक्त आहे. मेहेंदी वापरण्याचे जसे अनेक फायदे आहेत, तसेच काही तोटे देखील आहेत. मेहेंदीच्या अतिवापराने केस राठ, कोरडे होऊ शकतात. त्यामुळे मेहेंदीचा वापर करण्याआधी आणि केल्यानंतर केसांना भरपूर तेल लावावे. तेल केसांमध्ये थोडा वेळ राहू देऊन मग कोमट पाण्याने केस धुवावेत. आजकाल बाजारामध्ये निरनिराळ्या ब्रँड्सच्या मेहेंदी उपलब्ध असतात. पण या सर्वांपैकी खात्रीशीर ब्रँडची निवड करावी. अनेक मेहेंदींमध्ये भेसळ असण्याची शक्यता असते, तसेच त्यामध्ये रसायनांचा वापर केला गेला असण्याचीही शक्यता असते. या भेसळयुक्त किंवा रसायनमिश्रित महेंदीमुळे केसांची हानी होऊ शकते.