एखादा उद्योगधंदा सुरु करायचा म्हटले की त्याला जशी पैशाची गरज असते पण त्याचबरोबर तो पैसा कुठे आणि कसा गुंतवायचा याचे देखील ज्ञान असावे लागते आणि हाच मार्ग वापरून ब्रिटनमधील १९ वर्षीय भारतीय वंशांच्या तरुणाने उद्योगधंदा सुरू केला आणि तो केवळ १६ महिन्यांच्या अवधित ब्रिटनमधील सर्वात तरुण कोट्यधीश बनला.
त्याचे नाव अक्षय रुपारेलिया असे असून त्याने दीड वर्षांपूर्वी ‘डोअरस्टेप डॉट को डॉट यूके’ ही ऑनलाइन वेबसाईट सुरू केली. तो या वेबसाईटमार्फत मालमत्ता विक्रीचा व्यवसाय करतो. त्याने वेबसाईट सुरू झाल्यानंतर अल्पावधीतच चांगली प्रगती केली आणि बघता बघता त्याच्या कंपनीचा समावेश ब्रिटनमधील सर्वोत्तम १८ मालमत्ता खरेदी विक्री करणाऱ्या कंपनीत झाला. अक्षयच्या कंपनीत सध्या १२ कर्मचारी काम करतात. त्याने सुरुवातीला आपल्या नातेवाईंकांकडून सहा लाख रुपये कर्जाऊ घेत व्यवसायाची सुरूवात केली. त्याने शाळेत असताना लंडनमधील एका ग्राहकाचे घर तीन आठवड्यात विकून दाखवले होते. अक्षयच्या नावाची चर्चा तेव्हापासूनच होऊ लागली. अक्षयचे आई वडिल दोघंही कर्णबधीर असून त्याची आई शिक्षिका असून ती कर्णबधीर मुलांना शिकवते.
अक्षयला व्यवसायाची कल्पना ‘रायन एअर’चे संस्थापक मिशेल ओलोरी यांचे आत्मचरित्र वाचल्यानंतर सुचली. त्याने शाळेत असताना ओलोरींचे आत्मचरित्र वाचले होते. त्यांनी सर्वात कमी किंमतीत विमानप्रवासाची सेवा देऊ केली. ऑक्सफर्ड विद्यापीठात अर्थशास्त्र आणि गणित विषयाचे अक्षयचे शिक्षण सुरू होते. पण त्याने आपले शिक्षण व्यवसायाचा वाढता व्याप लक्षात घेऊन अर्धवट थांबवले आहे.