गुरुग्राम : इंजिनिअरींगची नोकरी सोडून मोत्यांची शेती गुरुग्रामच्या फरूखनगर तहसीलमधील जमालपुरमध्ये राहणा-या विनोद कुमारने सुरू केली असून तो आज या शेतीतून ५ लाख रूपयांपेक्षा जास्त वार्षिक कमाई करत असून त्याचबरोबर तो ही शेती कशी करावी याचे दुस-यांना प्रशिक्षणही देत आहे. त्याच्याकडे आज या शेतीची माहिती घेण्यासाठी मोठ्या संख्येने तरूण येत आहे.
२७ वर्षीय विनोद कुमारने सांगितले की, २०१३मध्ये आपण मानेसर पॉलिटेक्निकमधून मेकॅनिकल इंजिनिअरींगचा डिप्लोमा घेतल्यानंतर दोन वर्ष नोकरी केली. त्याचे वडीलही शेतकरी होते. प्रायव्हेट नोकरी करता करता त्याला शेतीत इंटरेस्ट होता. इंटरनेटवर आधुनिक शेतीची माहिती घेता घेता त्याला मोत्यांच्या शेतीची माहिती मिळाली. त्यानंतर याबाबत आणखी माहिती घेतल्यावर त्याला कळले की, कमीत कमी पैशांमध्ये आणि कमीत कमी जागेत ही शेती केली जाऊ शकते.
त्याने त्यानंतर देशातील मोत्यांच्या शेतीचे प्रशिक्षण देणा-या एकमात्र सेंट्रल इन्स्टिट्य़ूत ऑफ फ्रेश वॉटर एक्वाकल्चर भुवनेश्वर येथून एका आठवड्याचे प्रशिक्षण घेतले आणि लहान जागेत मोत्यांची शेती सुरू केली. विनोद कुमारने सांगितले की, ही शेती सुरू करण्यासाठी पाण्याच्या टॅंकची गरज असते. मेरठ, अलीगढ येथून ५ रूपये ते १० रूपयांमध्ये शिंपले विकत घेतले जाऊ शकतात. मच्छिमारांकडे ते सहज मिळतात. या शिंपल्यांना १० ते १२ महिने पाण्याच्या टॅंकमध्ये ठेवले जाते. जेव्हा शिंपल्याचा रंग सिल्व्हर होतो तेव्हा त्यात मोती तयार झाला असे समजावे. यासाठी लागणारा पूर्ण सेटअप उभा करण्यासाठी साधारण ६० हजार रूपयांचा खर्च येतो. या शेतीत सर्वात महत्वाची बाब म्हणजे शिंपल्यांची सर्जरी करणे ही आहे. यासाठी विशेष प्रशिक्षण घ्यावे लागते. एका शिंपल्यामध्ये दोन मोती तयार होऊ शकतात. जशी आकृती या शिंपल्यामध्ये ठेवली जाते तसा मोती त्यात तयार होतो. भगवान गणेश, शिव, ७८६ आदींचे मोती विनोद तयार करतो.
विनोदने सांगितले की, मोत्यांची क्वालिटी पाहून त्याची किंमत ठरते. एक मोतीची किंमत ३०० रूपयांपासून १५०० रूपयांपर्यंत मिळू शकते. याचे मार्केट सूरत, दिल्ली, मुंबई, हैदराबाद आणि कलकत्तामध्ये आहे. विदेशातही या मोत्यांना मोठी मागणी आहे. ज्यांच्याकडे मोत्यांचे उत्पन्न जास्त येते ते परदेशात ते पाठवू शकतात.