नवी दिल्ली : ई-कॉमर्सचा व्यवसाय देशात वेगाने वाढत असून सर्वत्र अॅमेझॉन, फ्लिपकार्ट सारख्या कंपन्यांचं ऑनलाईन नेटवर्क पसरत आहे. पण त्याचबरोबर यामाध्यमातून अनेक तक्रारी, समस्याही वेगाने वाढत आहेत. 1 ऑक्टोबरला ग्राहकांच्या तक्रारींच्या निवारणासाठी केंद्र सरकारने कन्झ्युमर अॅप लॉन्च केले होचे. या अॅपच्या मदतीने मिळत असलेल्या तक्रारींवरुन स्पष्ट होत आहे की, ग्राहक ऑनलाईन शॉपिंग साईट्सच्या कंपन्यांच्या कारभारावर संतुष्ट नाहीत.
ई कॉमर्स व्यापाराशी निगडीत आतापर्यंत मिळालेल्या एकूण तक्रारींपैकी 40 टक्के तक्रारी या आहेत. आतापर्यंत 556 तक्रारी आहेत, ज्यापैकी 138 तकारींचे निवारण करण्यात आलं असून 418 तक्रारी प्रलंबित आहेत. सरकारच्या माहितीनुसार ई कॉमर्सशी जोडलेल्या अनेक तक्रारी या सामनाच्या गुणवत्तेविषयी आहेत. अनेक ग्राहकांचे म्हणण आहे की, अनेकदा शॉपिंग वेबसाईटवर दाखवलेली वस्तू आणि प्रत्यक्ष आमच्यापर्यंत आलेले वस्तू यामध्ये फरक असतो. सामनाची गॅरंटी आणि रिटर्न संबंधी देखील ग्राहकांच्या अनेक तक्रारी आहेत.
ई कॉमर्सनंतर बँकिंग क्षेत्राशी निगडित सर्वाधिक तक्रारी आहेत. सरकारच्या अॅपवर आतापर्यंत बँकिंग क्षेत्रातील 196 तक्रारी प्राप्त झाल्या आहे. ज्यापैकी 78 तक्रारींचे निवारण करण्यात आले असून 118 तक्रारारी प्रलंबित आहेत. त्यानंतर टेलिकॉम सेक्टरमधील 132 तक्रारी प्राप्त झाल्या असून 51 तक्रारींच निवारण झाले आहे. याशिवाय इलेक्ट्रॉनिक, वीज, ब्रॉडबँड आणि डिजिटल पेमेंट क्षेत्रांचा समावेश आहे. या अॅपवर आतापर्यंत एकूण 2217 तक्रारी आल्या आहेत. ज्यापैकी 944 तक्रारींचे निवारण झाले आहे.
निवारण झालेल्या तक्रारींपैकी 922 तक्रारी दाखल झाल्याच्या 15 दिवसांच्या आत सोडवण्यात आल्या आहेत. पण या केवळ अॅपवर आलेल्या तक्रारी आहेत. याशिवाय संबंधित मंत्रालयाच्या नॅशनल कन्झुमर हेल्पलाईनवर रोज तक्रारींसाठी हजारो फोन येत असतात. या अॅपची वैशिष्ट्ये म्हणजे या विभागाचे मंत्री रामविलास पासवान यांचे यावर आलेल्या तक्रारींवर लक्ष असते. त्यामुळे रामविलास पासवान यांच्यापर्यंत या अॅपवर आलेल्या प्रत्येक तक्रारीची माहिती पोहोचते.