दिशेनुसार असे आहेत वास्तूशास्त्राचे नियम - Majha Paper

दिशेनुसार असे आहेत वास्तूशास्त्राचे नियम

vastu
आपले घर ही केवळ चार भिंतींची इमारत नाही, तर दिवसभराच्या कामाच्या धावपळीने थकल्या भागल्या जीवाला विसावा देणारी अशी वास्तू आहे. पण अनेकदा घरामध्ये वास्तुदोष उत्पन्न झाल्याने घरामध्ये नकारात्मक वातावरणाचे संचरण होत असून, घरामध्ये सतत लहान मोठ्या अडचणी, आर्थिक नुकसान, तब्येतीच्या तक्रारी वारंवार उद्भवू लागतात. अशा समस्या टाळण्यासाठी घराची रचना करताना वास्तूशास्त्र दिशांचा देखील विचार करते. प्रत्येक दिशेचा स्वतःचा स्वामी असतो, म्हणजेच वास्तुशास्त्रामध्ये प्रत्येक दिशेचे प्रतीक असलेले देवता आणि ग्रह सांगितले गेले आहेत. जर दिशा लक्षात न घेता वास्तूची रचना करण्यात आली, तर या घरामध्ये वास्तुदोष निर्माण होण्याची शक्यता उद्भवते. म्हणूनच वास्तूची रचना करताना आणि घरामध्ये वस्तूंची मांडणी करताना दिशा लक्षात घेणे अगत्याचे ठरते.
vastu1
पूर्व दिशेचा स्वामी सूर्य असून, इंद्र या दिशेचे देवता आहेत. त्यामुळे घराचे मुख्य प्रवेशद्वार पूर्वेला असणे शुभ मानले गेले आहे. घराचे द्वार जर पूर्वोत्तर दिशेला असले, तर अशा वास्तूमध्ये राहणाऱ्या व्यक्तींना उत्तम आरोग्य लाभते. घरामध्ये पूर्वेला बाथरूम असू नये. तसेच घराच्या पूर्वेला घरामधील उजेड अडेल अशी वस्तू नसावी. (उदा. एखादे मोठे झाड, किंवा भिंत). जर आपल्या घरामध्ये दिशेला अनुसरून एखादा वास्तूदोष असलेच, आणि तो हटविता येणे अशक्य असेल, तर घराच्या मुख्य प्रवेशद्वारावर, गायीच्या दुधापासून तयार केल्या गेलेल्या साजूक तुपामध्ये कुंकू कालवून त्याने प्रवेशद्वाराच्या वरच्या बाजूला स्वस्तिकाचे चिन्ह काढावे. तसेच घराच्या प्रवेशद्वाराच्या जवळ फुलझाडे लावावीत. शुक्रदेव ऐश्वर्याचा स्वामी असून, घरामध्ये सुख-शांती, संपन्नता प्रदान करणारा आहे. आग्नेय दिशेचा हा स्वामी असून, ज्यांच्या वास्तू आग्नेय दिशाभिमुख आहेत अशा वास्तूंमध्ये राहणाऱ्या महिलांचे आरोग्य उत्तम असते. या घरामध्ये धनधान्याची कमतरता होत नाही. जर अशा वास्तूमध्ये काही कारणाने वास्तूदोष उत्पन्न झाला, तर या दिशेला तुपाचा दिवा नेमाने प्रज्वलित केला जावा असे वास्तूशास्त्र सांगते. तसेच घराच्या या दिशेला एखादे फुलझाड लावणे ही शुभफलदायी ठरते.
vastu2
दक्षिण दिशेचा स्वामी मंगळ असून, या दिशेचा देवता यम आहे. ही दिशा जरी स्थिर मानली गेली असली, तरी जर मंगळ शुभफलदायी नसेल, तर दक्षिण दिशाभिमुख वास्तूमध्ये राहणाऱ्या लोकांच्या बाबतीत सतत काही ना काही आर्थिक अडचणी, तब्येतीच्या तक्रारी उद्भवत असतात. घराच्या या दिशेला जर वास्तुदोष आढळून आला, तर हा दोष नाहीसा करण्यासाठी या दिशेला खिडकीवर किंवा दरवाजावर एक लहानसा त्रिकोणी झेंडा लावावा. या दिशेला घरातील अडगळ ठेऊ नये. नैऋत्य म्हणजेच दक्षिण-पश्चिम दिशेचा स्वामी राहू असून, ही दिशा आयु आणि यश प्रभावित करणारी आहे. अचानक भय उत्पन्न करणारा असा या दिशेचा प्रभाव समजला जातो. तसेच जीवनात अचानक येणारे उतारचढावही या दिशेच्या परिणामस्वरूप येत असतात. नैऋत्य दिशाभिमुख घर कधी ही फार काळ बंद किंवा रिकामे राहू नये. या घरातील पाण्याची टाकी देखील नियमित स्वच्छ केली जावी. यामुळे वास्तुदोष निर्माण होत नाहीत.
vastu3
शनी पश्चिम दिशेचा स्वामी असून, वरूण या दिशेचे देवता आहेत. ही दिशा भाग्य, पौरुष, कर्म आणि यशासंबंधी कार्याची कारक आहे. जर या वास्तूमध्ये शनीचा प्रभाव शुभ नसेल, तर वास्तूदोष निर्माण होऊ शकतात. वारंवार असफलता मिळणे, घरामध्ये अशांती, इत्यादी समस्या यामुळे उद्भवू लागतात. हे वास्तूदोष दूर करण्यासाठी घरामध्ये धार्मिक ग्रंथांचे वाचन नेमाने केले जावे. वायव्य (उत्तर-पश्चिम) दिशेचा कारक चंद्र असून, वायू या दिशेचे देवता आहेत. जर चंद्राचा प्रभाव शुभ असेल तर घरामध्ये नेहमी सुख समृद्धी नांदते. जर चंद्र अशुभ फल देणारा असेल तर घरामध्ये नेहमी मानसिक तणाव पाहावयास मिळतो. हा वास्तुदोष दूर करण्यासाठी एका खोल पात्रामध्ये पाणी भरून त्यामध्ये फुले घालून ठेवावीत. ही फुले आणि पाणी दररोज बदलले जावे. दुधाच्या दानाने ही हा वास्तुदोष दूर होत असल्याचे वास्तूशास्त्र सांगते. उत्तर दिशेचा कारक बुध असून कुबेर या दिशेचे देवता आहेत. जर बुध शुभफलदायी असला, तर घरामध्ये नेहमी प्रसन्न वातावरण राहते. मात्र बुध लाभणारा नसेल तर घरामध्ये मानसिक तणाव आणि आर्थिक अडचणी येऊ लागतात. हा वास्तुदोष दूर करण्यासाठी घराच्या मुख्य प्रवेशद्वाराच्या जवळ फुलांच्या वेली लावाव्यात. तसेच कोणत्याही मोठ्या कामाला सुरुवात करण्यापूर्वी गुरुजनांची परवानगी घेतली जावी. ईशान्य दिशेचा स्वामी बृहस्पती असून, विष्णू या दिशेचे देवता आहेत. आध्यात्मिक उन्नती प्राप्त करून देणारी, ज्ञान प्रदान करणारी आणि मानसन्मानामध्ये वृद्धी करणारी अशी ही दिशा आहे. जर या वास्तूमध्ये ग्रहाचे अशुभ फल असेल तर वास्तुदोष निर्माण होतात. हे टाळण्यासाठी ईशान्य दिशाभिमुख घरामध्ये धार्मिक कार्ये नेमाने केली जावीत. तसेच घराचे मुख्य प्रवेशद्वार शोभिवंत केलेले असावे.

Leave a Comment