मुंबई – अद्याप कुठलाही तोडगा आर्थिक डबघाईला आलेल्या जेट एअरवेजच्या बाबत निघाला नसल्यामुळे जेटच्या ११०० वैमानिकांनी आजपासून विमान न उडविण्याचा निर्णय घेतला होता. पण मुंबईत आज जेट एअरवेज व एसबीआय यांच्यात महत्त्वाची बैठक होत असल्यामुळे वैमानिकांनी आपले आंदोलन तूर्तास मागे घेतले आहे. जेट एअरवेजचे शेकडो कर्मचारी मुंबईतील अंधेरी परिसरातील जेट एअरवेज कार्यालयाबाहेर जमले आहेत.
जानेवारी २०१९ पासून जेट एअरवेजच्या अभियंता, पायलट व इतर कर्मचाऱ्यांना मासिक वेतन न मिळाल्यामुळे ‘नॅशनल एविटर्स गिल्ड’ने या संदर्भात ‘वेट अँड वॉच’ची भूमिका घेतली आहे. अद्याप कुठलाही तोडगा आर्थिक डबघाईला आलेल्या जेट एअरवेजच्या बाबत न निघाल्यामुळे जेट एअरवेजची आज दिवसभरात केवळ ७ विमाने उडाली आहेत.