मुंबई – शिवसेना पक्षप्रमुख उद्धव ठाकरेंनी मागील वर्षी झालेल्या पोटनिवडणुकीत पराभव झाल्यानंतरही श्रीनिवास वनगा यांना उमेदवारी दिली जाईल असे जाहीर केले होते. पण आता राजकीय समीकरणे युती आणि महाआघाडीमुळे बदलल्याने उमेदवारी गावित यांना द्यावी असा आग्रह भाजपकडून होत असल्यामुळे राजेंद्र गावित यांचा शिवसेनेत पक्षप्रवेश करून त्यांना शिवसेनेकडून उमेदवारी देण्यात येणार आहे. तर विधानसभेत श्रीनिवास वनगा यांचे पुर्नवसन केले जाणार आहे
भाजप आणि शिवसेनेत पालघरचे भाजपचे दिवंगत खासदार चिंतामण वनगा यांच्या निधनानंतर झालेल्या पोटनिवडणुकीत जोरदार संघर्ष झाला होता. वनगा यांच्या कुटुंबियांवर या पोटनिवडणुकीत अन्याय होत असून त्यांच्या मुलाला उमेदवारी मिळावी यासाठी शिवसेना आग्रही होती. काँग्रेसचे माजी आमदार राजेंद्र गावित यांना भाजपने उमेदवारी दिली होती. भाजप विरुद्ध शिवसेना अशी लढत त्या पोटनिवडणुकीत पाहायला मिळाली. पण त्याच शिवसेनेने आता यु टर्न घेत श्रीनिवास वनगा यांना उमेदवारी न देता काँग्रेसमधून आलेल्या भाजपच्या राजेंद्र गावित यांना उमेदवारी देण्याचे निश्चित केले आहे. आमदार हितेंद्र ठाकूर यांच्या बहुजन विकास आघाडीला महाआघाडीने पालघरची जागा सोडली आहे.