2020 पासून मायक्रोसॉफ्ट बंद करणार ‘विंडोज 7’चा सपोर्ट

विंडोज 7 चा सपोर्ट 14 जानेवारी 2020 पासून बंद करण्यात येणार आहे. याचा अर्थ तुम्हाला विंडोज 7 चे अपडेट्स मिळणार नाहीत. सिक्युरिटी फिक्स आणि पॅचेस यांचाही या अपडेट्समध्ये समावेश आहे. संगणकाची या दोन्हीमुळे सुरक्षा होत असते.

विंडोज 7 चा अधिकृत फोरम सपोर्ट गेल्या वर्षी मायक्रोसॉफ्टने जून महिन्यातच बंद केला होता. मायक्रोसॉफ्टने सात जुलै 2009 रोजी Windows 7 सादर केले होते. विंडोज 7 नंतर Windows 8 , Windows 8.1 आलं. जुलै 2015 मध्ये Windows 10 लाँच करण्यात आलं. सध्या विंडोज 10 वापरणाऱ्या यूझर्सची संख्या 70 कोटींहून जास्त आहे.

कंपनी आता Windows 7 Extended Security Updates विकणार आहे. ही सुविधा सुरु ठेवायची असल्यास त्यासाठी पैसे मोजावे लागतील. अनेक वर्षांपासून एंटरप्राइजेस युजर्स विंडोज 7 चा वापरत असल्यामुळे त्याचा वापर एकदम बंद करणे कठीण आहे. हे अपडेट सामान्य ग्राहकांना मिळणार नाहीत. मायक्रोसॉफ्टने यापूर्वी Windows XP आणि Vista चाही सपोर्ट बंद केला आहे.