मुंबई : सार्वजनिक सुट्ट्यांमुळे जानेवारी महिन्याच्या दुसऱ्या आठवड्यात १२ ते १४ जानेवारी असे सलग तीन दिवस बँक व्यवहार बंद राहणार असल्यामुळे बँक कर्मचारी संघटनेने दुस-या आठवड्याच्या सुरुवातीलाच महत्त्वाचे व्यवहार आटोपण्याचे आवाहन केले आहे, जेणेकरून ग्राहकांना तिस-या आठवड्यात अधिक त्रास सहन करावा लागणार नाही.
दुसरा शनिवार १२ जानेवारीला, १३ जानेवारीला रविवार आणि १४ जानेवारीला मकरसंक्रांत आणि पोंगल सणांमुळे बँक कर्मचा-यांना सुट्टी असेल. परिणामी, रोख व्यवहारांसह धनादेश वठणावळही बंद असेल. शनिवारी व रविवारी ग्राहक रोख रकमेसाठी बँक एटीएमवर उड्या घेतील. त्यामुळे ऐन सणासुदीत रोख रकमेची चणचण जाणवू शकते. परिणामी, आॅनलाइन व्यवहारापासून दूर असलेल्या ग्राहकांनी खबरदारी घेण्याचे आवाहन बँक कर्मचारी संघटनेने केले आहे.