आयर्लंडच्या वायग्रा मिश्रित हवेमुळे नागरिक जोशात


यौनशक्ती व यौनजोम वाढविण्यासाठी वापरण्यात येणार्‍या वायग्रा औषधांच्या कारखान्यातून बाहेर पडणार्‍या धुराचा वेगळाच परिणाम आयर्लंडमध्ये झाला असल्याचा दावा केला जात असून या हवेमुळे एक आगळ्याच प्रकारचा जोश व जोम नागरिक अनुभवत असल्याचे समजते. हे औषध तयार करणार्‍या फायझर या प्रसिद्ध औषधनिर्मिती क्षेत्रातील कंपनीचा कारखाना आयर्लंडच्या दक्षिणपश्चिम भागातील काऊंटी कॉर्क येथे आहे. या कारखान्यातून बाहेर पडणारा धूर रहिवाशांसाठी त्रासदायक असला तरी त्यांची त्याविरोधात तक्रार मात्र नाही.

मिळालेल्या माहितीनुसार या धुरामुळे या भागातील पुरूष महिलाच नाही तर कुत्रीही उत्तेजित होत आहेत. हा प्रेमभरा धूर नागरिकांना मोफत मिळतो आहे इतकेच नव्हे तर त्या कुतुहलापोटी येथे बाहेरच्या भागातूनही लोक येत आहेत व पुन्हा परत जात नाहीत असेही सांगितले जात आहे. या हवेतच कांही तरी आहे याचा अनुभव येथे येणारा प्रत्येकजण घेतो आहे. कंपनीत तयार होत असलेले वायग्रा येथील जमीन, पाणी, हवेत मिसळत असल्याचा कांही जणांचा दावा आहे मात्र कंपनीने हे सारे आरोप फेटाळून लावले आहेत.