सततचा थकवा घालवण्यासाठी…..


अतीशय काम करावे लागले किंवा दगदग झाली की थकवा जाणवतो. काही वेळा हा थकवा थंड पेयाच्या सेवनाने जातो, काही वेळा थोडी विश्रांती घेतली की जातो किंवा सिनेमा पहायला गेल्याने जातो पण काही वेळा आपल्याला सततच थकल्यासारखे वाटते. तात्पुरत्या उपायांनी हा थकवा जात नाही. हा थकवा गंभीर स्वरूपाचा असू शकतो. त्यावर मुळातून इलाज करावा लागतो. अशा थकव्याची पाच कारणे असतात. त्यातल्या कोणत्या कारणाने थकवा जाणवत आहे हे तपासून पहावे लागेल. पहिले कारण म्हणजे कसल्या तरी कारणाने सतत अस्वस्थ होणे. घर बांधायला काढले असेल तर त्यात रोज अडचणी येतात. कामे वेळेवर होतील की नाही याची चिंता वाटायला लागते. ते घर बांधून पूर्ण होईपर्यंत जीवात जीव येत नाही. सतत थकल्यासारखे आणि गळून गेल्यासारखे होते.

माणूस दिवसभर काम करून थकतो पण त्याला छान झोप मिळाली की, छान वाटते. झोपेतून जागा होतो तेव्हा एकदम ताजे तवाने वाटायला लागते. मात्र काही लोकांना सततच कमी झोप मिळते. कितीही प्रयत्न केला तरी लवकर झोपण्याची संधी मिळत नाही. उशिरापर्यंत जागावे लागतेच पण पहाटेच झोपण्याच्या खोलीत लोकांची खडबड सुरू होते. त्यामुळे कितीही प्रयत्न केला तरीही उशिरा पर्यंत झोपायला मिळत नाही. थकवा गेलेला नसतानाही उठावे लागते. अशी अर्धवट झोपेच्या स्थितीत कामे करीत रहावे लागते. त्यामुळेही सतत थकवा जाणवत रहातो. कामे नीट होत नाहीत. तेव्हा कमी झोप मिळणे हेही सततच्या थकव्याचे कारण आहे.

अशक्तपणा हेे एक सततच्या थकव्याचे मोठे कारण आहे. काम केल्याने माणसाच्या शरीरातली ऊर्जा खर्ची पडलेली असते. ती भरून काढूनच दुसर्‍या दिवशीच्या कामाला लागले पाहिजे पण ती खर्चलेली उर्जा भरून निघण्याएवढे सकस अन्न खायला मिळत नाही. आवश्यक ती जीवनसत्त्वे आणि प्रथिने आहारातून मिळत नाहीत. परिणामी कोणतेही काम करण्याची ताकद अंगात रहात नाही. तशा अवस्थेत काम करीत राहिल्याने जादा थकवा येतो आणि सतत थकवाच येतो. शरीरातल्या अनेक प्रकारच्या ग्रंथींमध्ये थायरॉईड ग्रंथी फार महत्त्वाच्या असतात. थायरॉइड कमी सक्रिय असणे आणि गदीच निष्क्रिय असणे अशा दोन्ही अवस्थांत थकल्यासारखे वाटत रहाते. शरीरात कसलाही संसर्ग असला तरीही थकल्याची जाणीव होते. संसर्ग असतो पण ताप नसतो. आपण आजारी आहोत हे कळत नाही पण संंसर्गाने काम करण्याची क्षमता कमी होते.