देशातले पहिले हेलिपॉड दिल्लीच्या रोहिणी भागात तयार झाले असून त्याचे उद्घाटन २८ फेब्रुवारीला होणार आहे. या हेलिपॉडवरून दिल्लीच्या आसपासच्या भाग तसेच देशातील अन्य कोणत्याही ठिकाणी जाण्यासाठी हेलिकॉप्टर बुक करता येणार आहे. त्यासाठी तयार करण्यात आलेल्या टर्मिनल बिल्डींगमध्ये १५० प्रवासी बसू शकतात, येथे चार हँगर्सही उभारले गेले असून तेथे १६ हेलिकॉप्टर उभी करता येतात. त्यासाठी नऊ पार्किंग वे आहेत.
अॅव्हीएशन विभागाचे सचिव आर.एन.चौबे या संदर्भात माहिती देताना म्हणाले की हा १०० कोटी रूपयांचा प्रकल्प असून या प्रकल्पाची मालकी पवनहंस हेलिकॉप्टर कडे आहे. ही दक्षिण आशियातली सर्वात मोठी हेलिकॉप्टर कंपनी असून त्यांच्या ताफ्यात ५० हेलिकॉप्टर्स आहेत. ही कंपनी भारत सरकारच्या आधीन आहे. हेलिपॉड सुविधेमुळे हेलिकॉप्टर प्रवास सर्वसामान्यांच्या आवाक्यात येणार आहे. या सेवेने देशातील महत्त्वाची सर्व ठिकाणे जोडली जाणार असून प्रथम टप्प्यात दिल्ली, सिमला, हरिद्वार, डेहराडून, मथुरा, आग्रा, मेरठ व मणेसर ही शहरे जोडली जाणार आहेत.